MANISPAA YA TEMEKE YAADHIMISHA JUMA LA ELIMU YA WATU WAZIMA

Posted on: October 4th, 2024

Na: Sweetbetter Njige

       TMC Habari.

Leo Oktoba 4, 2024 manispaa ya Temeke kupitia idara ya elimu msingi imeadhimisha juma la elimu ya watu wazima katika viwanja vya Zakhem- Mbagala na kuhimiza fursa ya elimu kwa wote.

Akizungumza kwa niaba ya mgeni rasmi,  mkuu wa wilaya ya Temeke (mhe. Sixtus Mapunda) afisa tarafa ya Mbagala Betha Minga amesema kuwa Serikali ya awamu ya sita imelenga kuboresha elimu kwa watu wazima ili kutoa fursa kwa wote.

"Lengo la Serikali ni kuifanya elimu kuwa jumuishi kwa makundi yote. Hii ni kwa watu wazima na wale ambao walipata ujauzito shuleni wakakatisha masomo bado wanayo fursa ya kurudi shule kusoma. Tunajua umuhimu wa watu kujifunza stadi mbalimbali licha ya kuwa nje ya mfumo rasmi wa elimu. Nimeona baadhi ya maafisa maendeleo hapa, ile 4% ya mikopo kwa vijana tuwaangalie na hawa kwa sababu tayari wana ujuzi na wanaaminika".

Akisoma risala mbele ya mgeni rasmi mratibu wa elimu ya watu wazima manispaa ya Temeke Noconia Yusufu amesema maadhimisho hayo yanalenga kuimarisha uratibu, usimamizi na kuthamini maendeleo ya utekelezaji wa shughuli za elimu ya watu wazima na elimu nje ya mfumo rasmi.

Maadhimisho ya juma la elimu ya watu wazima huazimishwa na Nchi mbalimbali Duniani ambazo ni wanachama wa UNESCO, huungana katika kupima na kutafakari mafanikio na changamoto zilizopo katika utoaji wa elimu ya watu wazima.