MANISPAA YA TEMEKE YAPOKEA KIANZIO CHA UJENZI WA HOSTELI ZA WANAFUNZI WA KIKE MKOA WA DSM

Posted on: January 19th, 2024

Na: Joanita Joseph -TMC Habari

Katika kuunga mkono juhudi za serikali hususani kwenye uboreshaji wa miundombinu ya elimu hapa Nchini, Mkuu wa mkoa wa Dar es salaam Mhe. Albert Chalamila januari 19, 2023 katika hafla ya uzinduzi wa mpango wa ujenzi wa hostel mkoa wa DSM ameikabidhi halmashauri ya manispaa ya Temeke mabati na fedha kiasi cha shilingi Milioni 20 zitakazotumika kama kianzio cha ujenzi wa hostel (daharia) kwa wanafunzi mkoa wa Dar es salaam.

Akizungumza wakati wa hotuba yake Mhe. Chalamila amesema kuwa mpango huo utaanza na ujenzi wa hostel za kike ili kuwaondolea mazingira hatarishi na changamoto hasa wanapotoka mbali kuja kufata elimu.

"Mtoto wa kike lazima awe katika mazingira mazuri sana ya kumlinda kwakuwa ndiye aliyebeba kizazi cha kesho, tukiwekeza kwa msichana kuanzia sasa maana ake tutapata kizazi kilicho bora kwasababu watu wote watakuwa wamekaa kwenye tumbo lililo salama" alisema Mhe. Chalamila.

Mhe. Chalamila ameitaka kila halmashauri kuandaa harambee (fundraising) kwa ajili ya kupata vifaa vya kuendeleza ujenzi, kuja na mpango kazi maalum na kutoa fedha pamoja na kuchora ramani ya jengo la hostel itakayowezesha kubeba wanafunzi wasiopungua 80 mpaka 120 kulingana na taratibu za TAMISEMI ambapo atakuja kuichagua ramani ya mfano pindi atakapokuja kugawa fedha kwa awamu ya pili.

Halkadhalika, amemtaka kila Mkuu wa wilaya kuunda timu ndogo ya kufatilia wajibu wa kurudisha kwa jamii (Corporate Social Responsibility) kwenye eneo lake ambayo kipaumbele chake kitakuwa ujenzi wa hostel hiyo.

Aidha Mhe. Chalamila amesema kuwa mkoa wa DSM unaandaa utaratibu wa harambee ambapo watapata changizo kubwa kutoka kwa wadau na fedha hizo zitaelekezwa kwenye halmashauri zote.

Nae Ndg.Elihuruma Mabelya, mkurugenzi wa halmashauri ya manispaa akizungumza kwa niaba ya wakurugenzi amehaidi kutekeleza kwa vitendo maagizo hayo ikiwemo kutafuta wadau wa kuwaunga mkono katika kufanikisha jambo hilo muhimu.