MANISPAA YA TEMEKE YAPOKEA UGENI KUTOKA JIJI LA ARUSHA

Posted on: November 7th, 2023

Na, Joanita Joseph-TMC Habari

Halmashauri ya Manispaa ya Temeke leo Novemba 07, 2023 imepokea ugeni wa Waheshimiwa Madiwani pamoja na wataalamu kutoka halmashauri ya jiji la Arusha unaolenga kujifunza na kubadilishana uzoefu katika utekelezaji wa majukumu ikiwemo ukusanyaji wa mapato ya ndani na uibuaji pamoja na usimamizi wa miradi ya Maendeleo.

Akizungumza katika kikao Cha mapokezi Mstahiki Meya wa Manispaa ya Temeke Mhe. Abdallah Mtinika ametoa wito kwa viongozi kufanya mambo yatakayoiletea heshima Serikali ya Jamhuri ya Muungano wa Tanzania chini ya Uongozi wake Dkt Samia Suluhu Hassan ikiwa ni pamoja na kujifunza kwa wengine ili kupata mafanikio na hatimaye maendeleo kwa Taifa kiujumla.

Mara baada ya kikao hicho Ugeni huo ulipata fursa ya kutembelea miradi ya maendeleo inayotekelezwa katika Manispaa hii ikiwemo soko jipya la kisasa Mbagala Zakhiem lililogharimu takribani Bilioni 2.4 likitarajiwa kubeba wafanyabiashara zaidi ya 400.

Vilevile walitembelea mradi wa ujenzi wa ghorofa 6 ikiwa ni upanuzi wa hospitali ya Mbagala Rangi Tatu unaotarajiwa kugharimu shilingi Bilioni 10.8 unaotekelezwa kwa fedha za mapato ya ndani na ruzuku kutoka serikali kuu ambapo kukamilika kwake kutaboresha huduma za kiafya ikiwemo za kibingwa pamoja kupunguza msongamano wa wagonjwa katika hospitali hiyo.

Halkadhalika waliweza kutembelea miundo mbinu ya barabara ikiwemo na daraja la Nzasa-kilungule ambayo imesaidia kupunguza foleni na kuwaondolea adha wakazi wa kilungule na Buza kutokana na kushindwa kupita wakati wa mvua.

Kwa upande wake Naibu Meya wa jiji la Arusha Mhe Abraham Mollel amepongeza na kutoa shukrani kwa Uongozi wa Manispaa ya Temeke.

"Tunawapongeza sana Temeke na ziara hii imekuwa chachu ya maendeleo katika jiji letu, tunawashukuru sana na tukirudi Arusha tutakwenda kukaa na kujadili namna tunafanya mambo ambayo tumejifunza katika Manispaa hii" alisema Mhe. Mollel.

Halmashauri ya Manispaa ya Temeke imekuwa ikipokea wageni kutoka halmashauri mbalimbali ikiwa ni moja ya nyenzo katika uboreshaji wa mahusiano na kujifunza mambo mbali mbali katika uendeshaji wa halmashauri na utekelezaji wa miradi.