MANISPAA YA TEMEKE YASAINI MKATABA WA UNUNUZI WA GREDA

Posted on: January 20th, 2022

 Katika kuhakikisha inapunguza ama kumaliza kabisa kero ya ubovu wa miundombinu ya barabara katika manispaa ya Temeke,Uongozi Halmashauri hiyo imeamua kununua "greda" kutokana na pesa za makusanyo ya ndani.

Akizungumza katika utiaji saini mkataba wa ununuzi wa mtambo huo,Mstahiki Meya wa  halmashauri ya manispaa ya Temeke Mheshimiwa Abdallah Mtinika amesema kuwa lengo la kununua vifaa vyote kamili vinavyohusika na ujenzi wa barabara ili kuondoa kabisa kero za wakazi wa Temeke.

"Napenda kuwahakikishia wanatemeke kuwa tutaendelea kuendesha Halmashauri hii katika misingi ya ukweli na uwazi....nakupongeza sana Mkurugenzi kwa busara hii kwa kulifanya jambo hili kwa uwazi ili watu wajue kwa sababu watu wanataka kuona sisi tunafanya nini".Alisema Mtinika.

Akizungumza mbele ya waandishi wa habari na wawakilishi wa kampuni inayojishughulisha na uuzaji wa mitambo hiyo ya MANTRAC TANZANIA LIMITED,Mhe.Mtinika amesisitiza utunzaji wa mitambo hiyo huku akimshauri Mkurugenzi wa Manispaa hiyo ikiwezekana kuomba watumishi kutoka Ofisi ya Tawala za Mikoa na Serikali za Mitaa(TAMISEMI) wenye uwezo wa kusimamia na kuendesha mitambo hiyo.

Kwa upande wake Mkurugenzi wa manispaa ya Temeke Ndugu Elihuruma Mabelya aliwashukuru wananchi wa Temeke kwa kulipa kodi zilizowezesha ununuzi wa greda hilo.

"Greda hili Mstahiki Meya ni lao,sasa Temeke tutembee kifua mbele maana mambo mazuri yanakuja....nitumie tu nafasi hii tu kuwataka wananchi wenzangu wa Temeke kulipa kodi wasikwepe maana manufaa tunayaona".Alisisitiza Mkurugenzi huyo.

Greda hilo lenye thamani ya shilingi milioni mia saba sabini na tisa linatarajiwa kuwasili manispaa ya Temeke  wiki ijayo litakuwa mkombozi mkubwa kwa wakazi wa maeneo ambayo yana changamoto za miundombinu ya barabara katika manispaa hiyo yenye jumla ya kata 23.