"TUNATAKA KUWEKA MAZINGIRA BORA YA UWEKEZAJI" DEOGRATIUS LUKOMANYA.

Posted on: January 28th, 2021

Mkutano maalum uliowakutanisha wawekezaji,taasisi za kiserikali na mashirika ya umma umefanyika leo katika ukumbi wa mikutano wa Manispaa temeke huku wawekezaji wakihakikishiwa mazingira bora ya uwekezaji.

Akizungumza pembeni mwa mkutano huo,Mkuu wa Idara ya mipango,Takwimu na Ufuatiliaji wa manispaa ya Temeke Bw Deogratius Lukomanya alisema kuwa halmashauri hiyo imejipanga kutatua kero na changamoto zinazoikabili sekta hiyo ili kuleta mazingira rafiki kati ya taasisi hizo na wawekezaji.

"Kikao chetu kimeenda vizuri na hata hawa wawekezaji wameuliza maswali ambayo mengine yamepatiwa ufumbuzi papo hapo na mengine yanayohitaji majibu zaidi yatatafutiwa majibu".Alisema Bw Deogratius.

Kwa upande wake Afisa mkuu matekelezo wa Mfuko wa Fidia kwa Wafanyakazi(WCF) Bw Paschal Richard alibainisha kuwa changamoto kubwa wanayokutana nayo ni uelewa mdogo wa waajiri na waajiriwa pale inapotokea mwajiriwa amepata majeraha au ulemavu anapokuwa eneo la kazi.

"Sisi tunapopata taarifa za mwajiriwa hata kama michango yake haijaanza kutumwa na kama ameapata tatizo la kuumia akiwa kazini tunafuatilia mara moja".Alisitiza Bw Afisa huyo.

Naye mwakilishi wa kampuni ya ALAF Bw.Petro Kapembwa alielekeza malalamiko yake kwa Shirika la Umeme nchini(TANESCO) juu ya kukatika kwa umeme mara kwa mara hali inayowasababishia hasara kubwa.

Mbali na hilo mwakilishi huyo alielezea changamoto nyingine inayowakabili ni kuhusu mifuko ya hifadhi ya jamii ambayo iliunganishwa na kupelekea waajiriwa kuwa njia panda wasijue wapi pa kwenda.

"Kuna mkanganyiko mkubwa kwa mfano mimi napata maelekezo kutoka Temeke kwa kiongozi wangu lakini kuna matawi mengine mikoani,nawezaje kutumia maelekezo ya Temeke nikiwa huko mikoani?"Alihoji Bw. Petro.

Mkutano huo ulishirikisha makampuni binafsi,mashirika ya umma,taasisi za kiserikali pamoja na uongozi wa manispaa ya Temeke na kwa pamoja wamekubaliana mkutano huo ufanyike kila baada ya miezi mitatu.

ReplyForward