MEYA MANISPAA YA TEMEKE AKABIDHI BIMA ZA AFYA 100 KWA WAZEE

Posted on: April 12th, 2023

Na; Sweetbetter Njige TMC Habari

Mstahiki meya wa manispaa ya Temeke mheshimiwa Abdallah Mtinika amekabidhi bima za afya kwa wazee 100 wa mtaa wa Dovya kata ya Chamazi kupitia taasisi isiyo ya faida ya ATHUMAN KAPUYA FOUNDATION.

Akizungumza katika zoezi hilo Mhe. Mtinika ameupongeza uongozi wa Taasisi hiyo kwa kugusa kundi muhimu zaidi katika jamii.

"Niipongoze taasisi hii kwa kazi kubwa na nzuri, mmegusa kundi sahihi, wazee wetu katika nchi yetu wamefanya mambo mengi, wana mchango mkubwa katika Chama na Serikali, zinapotokea taasisi kama hizi kusaidiana na Serikali kusaidia wazee sisi kama viongozi tunafarijika sana, mmefanya jambo la heri la kumpendeza Mungu, ukimsaidia mtu matibabu umeokoa maisha yake".Alisema Meya huyo

Kwa upande wao wazee hao wamemshukuru Mstahiki meya na viongozi wa taasisi hiyo kwa msaada huo muhimu kwao kwa kuwa utasaidia kuondoa changamoto ya matibabu.

Aidha Mhe. Mtinika amesema taasisi zote zenye lengo jema la kuisaidia Jamii atazipa kipaumbele katika Manispaa hii na si zile zenye malengo ya kubomoa maadili na utamaduni wa mtanzania.

Mbali na kadi hizo 100 zilizotolewa,taasisi hiyo ya ATHUMANI KAPUYA FOUNDATION inayoongozwa na aliyewahi kuwa Waziri wa Ulinzi katika Serikali ya awamu ya nne Athumani Juma Kapuya pia imetoa viti mwendo(wheelchairs) kwa wenye ujitaji.