MEYA MTINIKA AKABIDHI IDARA YA FEDHA TEMEKE MAGARI YENYE THAMANI YA MILIONI 179

Posted on: July 11th, 2024

Na:Shalua Mpanda-TMC

Mstahiki meya wa manispaa ya Temeke mheshimiwa Abdallah Mtinika amekabidhi magari matatu aina ya Suzuki yenye thamani ya Shilingi milioni 179.8 kwa Idara ya Fedha ya Manispaa hii kwa ajili ya kurahisisha ukusanyaji wa mapato.

Akiongea kwenye hafla fupi ya kukabidhi magari hayo,Mhe.Mtinika amesema kupatikana kwa magari hayo kutasaidia kupunguza changamoto ya usafiri iliyokuwa inaikabili Idara hiyo.

"Tunajua mnafanya kazi nzuri na kwa mwaka wa fedha uliopita tumekusanya mapato kwa asilimia 100 na kufikia malengo yetu,hivyo magari haya yataenda kuongeza kasi ya ukusanyaji wa mapato".Alisema Meya Mtinika.

Kwa upande wake mkurugenzi wa Manispaa hii Elihuruma Mabelya amesema kwa mwaka huu wa fedha 2024/25 wamepanga kukusanya Shilingi bilioni 53 hivyo magari hayo yatatumika kama nyenzo muhimu kusaidia mapato hayo.

Ameongeza kuwa bila ushirikiano wa watumishi hawataweza kukusanya kiasi hicho na kuvuka lengo walilojiwekea.

Manispaa ya Temeke kwa miaka mitatu mfululizo imekuwa ikivuka malengo katika ukusanyaji wa mapato ambapo kwa mwaka 2023/24 ilipanga kukusanya kiasi cha Shilingi bilioni 47 na kimekusanywa kwa asilimia 100.