MEYA MTINIKA AWAPOKEA WASHIRIKI WA MAFUNZO YA TEKNOLOJIA STAHIKI YA NGUVU KAZI

Posted on: November 1st, 2024

Na: Joanita Joseph

      TMC Habari.

Mstahiki Meya wa Manispaa ya Temeke Mhe. Abdallah Mtinika leo Oktoba 30, 2024 amewapokea Washiriki wa Mafunzo ya teknolojia stahiki ya nguvu kazi yanayotolewa katika Chuo kikuu cha Sayansi na Teknolojia Mbeya (MUST) waliofika katika Manispaa ya Temeke kwa lengo la kwenda kuona na kujifunza kwa vitendo Miradi iliyotekelezwa chini ya Wakala ya Barabara Vijijini na Mijini (TARURA) kwa kutumia teknolojia ya nguvu kazi.

Akizungumza katika Viwanja vya Manispaa ya Temeke Mhe. Mtinika amesema

'sisi Temeke tumeendelea kuwa walezi na wapokeaji wa jambo hili, mafunzo yenu ni muhimu sana mkimaliza mji 'organize' kwenye vikundi haraka ili muweze kuchangamkia fursa zilizopo katika halmashauri zetu za mikopo ya 10% kwa kundi la Wanawake, Vijana na Watu wenye ulemavu zilizopo katika halmashauri zetu ili mje mtumikie Nchi yenu na mfanye malengo yaliyokusudiwa'

Aidha Mhandisi Paul Mhere, Meneja TARURA wilaya ya Temeke amesema

'Serikali inatenga 30% kwa ajili ya makundi maalum yaani vijana, wanawake na walemavu kutumia teknolojia stahiki ya nguvu kazi katika miradi inayotekelezwa, na sisi TARURA tukiwa wadau wa jambo hili tumekuwa tayari na tutaendelea kutoa ushirikiano kwenu ili kuhakikisha tunakuza viwango vyenu kwa manufaa ya Nchi yetu' alisema Mhandisi Mhere.

Miongoni mwa elimu wanazopatiwa Washiriki wa Mafunzo hayo ya muda mfupi katika Chuo kikuu cha Sayansi na Teknolojia Mbeya ni pamoja na elimu ya usalama kazini, usafi, ubora, ufunguaji wa kampuni zinazojihusisha na teknolojia ya nguvu kazi stahiki.