MHE JOKATE AANZA NA MWENDOKASI MBAGALA, ATOA MAAGIZO MAZITO

Posted on: June 24th, 2021

Mkuu wa wilaya Temeke Mh.Jokate  Mwegelo amefanya ziara yake ya kwanza ya kikazi kwa kutembelea ujenzi wa barabara ya mwendokasi eneo linaojengwa barabara za juu(flyover) Uhasibu Temeke,Dar es salaam.

Akiwa katika eneo hilo ameweza kusikiliza kero mbalimbali za wananchi zinazotokana na mradi huo ambapo ametoa maagizo kwa Mhandisi mshauri, Mhandisi Rogers Chegula kuhakikisha anazitafutia ufumbuzi.

Baadhi ya kero amabazo zilitolewa na wananchi hao ni msongamano mkubwa wa magari nyakati za asubuhi na jioni,vumbi linalotokana na ujenzi huo pamoja na mashimo katika barabara hiyo.

"Hili tatizo la vumbi mmesikia hapa kuwa mnaweza kubadilisha muda wa kumwagia maji,badala ya kumwagia usiku wakati watu wamepumzika na starehe zao,na badala yake mnaweza mkamwagia maji saa 4 na saa 8 au saa 10 jioni".Alishauri Mhe.Jokate

Akitolea ufafanuzi kuhusu foleni katika barabara hiyo mkuu wa kikosi cha usalama barabarani mkoa wa kipolisi Temeke SP Africanus Sulle amesema wanajitahidi kuhakikisha wanaweka askari maeneo yote ili kuweza kupunguza adha hiyo huku akiwashauri waendesha pikipiki kutii sheria za barabarani ili kuepusha ajali zinazoweza kuepukika.

"Niwaombe tu waendesha pikipiki mfuate sheria za barabarani, kwa mfano unakuta taa zimesimamisha magari ila ninyi mnapita ambapo mnaweza kusababisha ajali".Amesema kamanda huyo

Katika ziara hiyo  Mhe Jokate aliambatana na wakuu mbalimbali wa idara kutoka manispaa ya Temeke ,kamati ya ulinzi na usalama ya Wilaya na aliwataka viongozi hao kufanya kwa vitendo maagizo yote huku akitumia msemo wa lugha ya kabila la kimakonde "zilongwa zitendwa",akimaanisha ukisema,tenda.