Mhe Kandege Naibu waziri OR-TAMISEMI aipongeza Manispaa ya Temeke kwa kuchapa kazi.

Posted on: June 24th, 2020

NAIBU WAZIRI OR-TAMISEMI MHE JOSEPHAT KANDEGE AFANYA ZIARA MANISPAA YA TEMEKE

Naibu waziri OR-TAMISEMI Mhe Josephat Kandege leo amefanya ziara ya kikazi katika Halmashauri ya Manispaa ya Temeke Jijini Dar es Salaam.

Na kupokelewa na Mkurugenzi wa Manispaa Ndg Lusubilo Mwakabibi pamoja na wakuu wa idara na vitengo wa Halmashauri hiyo.

Lengo la ziara yake ni kufuatilia namna manispaa ya Temeke inavyokusanya mapato na matumizi ya fedha hizo zinazotokana na makusanyo hayo katika kuwaletea wananchi maendeleo.

Naibu waziri OR-TAMISEMI Mhe Josephat Kandege katika picha akiwa na Mkurugenzi wa Manispaa Ndg Lusubilo Mwakabibi mwenye kofia akimpa maelezo mara baada ya kukagua mradi wa ujenzi wa kituo cha afya cha kisasa Yombo vituka Temeke. 

Akiwa katika ziara hiyo Mhe Naibu Waziri ametembelea miradi miwili ambayo ni mradi wa ujenzi wa Kituo cha afya Yombo vituka na Kiwanda cha ushonaji nguo Kibonde maji Temeke.

Mhe Kandege amepongeza namna Manispaa ya Temeke inavyotekeleza miradi ya maendeleo kwa kiwango cha juu kwa kutumia fedha za mapato ya ndani akitolea mfano ujenzi wa kisasa wa  gorofa mbili kituo cha afya Yombo vituka pamoja na utoaji wa mikopo ya asilimia 10 kwa wanawake, Vijana na watu wenye ulemavu ambapo manispaa ya Temeke imekua ikitoa vifaa badala ya fedha.

‘Utaratibu wa utoaji mikopo ya asilimia 10 kwa kuwapa vifaa ni mzuri kwa kuwa unatengeneza ajira lakini pia urejeshaji wake sio wa mashaka na hata ikitokea wameshindwa kurejesha Manispaa inauwezo wa kuchukua vifaa vyake,” alisema Mhe Kandege.

Aidha akiwa katika kituo cha afya Yombo vituka ameshauri menejimenti ya Manispaa chini ya Mkurugenzi Ndg Lusubilo Mwakabibi kuona namna ya kujenga nyumba za watumishi kwa kuwa eneo lipo, pia kwa upande wa Jukwaa la wanawake JUWATE ambao wanakiwanda cha ushonaji wanufaika wa asilimia 10 ameshauri Manispaa kuwasaidia kupanua soko hususani sare za wanafunzi kwa kuhakikisha sare za wanafunzi wote wa Temeke zinatoka katika kiwanda hicho.

Naibu Waziri TAMISEMI Mhe Kandege akiongea na mmoja kati ya mafundi wa kushona alipozuru Jukwaa la wanawake Temeke (JUWATE) ambao ni wanufaika wa mikopo ya 10% inayotolewa na Manispaa ya Temeke.

Kwa ujumla ameipongeza Manispaa ya Temeke kwa ubunifu, ukusanyaji na usimamizi mzuri wa mapato ya ndani pamoja na utekelezaji wa miradi ya maendeleo kwa lengo la kuleta ustawi wa wananchi na kuzitaka Halmashauri zingine nchini kuja kujifunza Temeke.