MHE. MAPUNDA AWATAKA WAKAZI MABONDENI KUONDOKA HARAKA

Posted on: November 3rd, 2023

Sweetbetter Njige 

TMC Habari

Mkuu wa wilaya ya Temeke mhe. Sixtus Mapunda amewataka Wananchi waishio mabondeni kuondoka mara moja kuepuka madhara yatokanayo na mvua zinazoendelea.

Ameyasema hayo leo Novemba 3,2023 alipotembelea maeneo yaliyoathirika katika kata ya Kijichi mtaa wa Msikitini na kata ya Kilakala mtaa wa Bongotonyo ambapo wakazi wake wapo kwenye hatari ya kukumbwa na mafuriko.

"Niwaombe wana Temeke wote ambao mko mabondeni, hizi mvua tumetangaziwa zaidi ya mwezi, zitafika na zitaleta madhara makubwa.  Sisi wote ni watu wazima, tuna familia na tunajua tupo bondeni tafadhali tutoke kabla madhara hayajawa makubwa"

Katika ziara hiyo mhe. Mapunda amesisitiza juu ya tahadhari iliyotolewa na mamlaka ya hali ya hewa (TMA) juu ya uwepo wa mvua nyingi na kusisitiza Wananchi walioko mabondeni kuhamisha familia ikiwemo watoto na watu wazima na kusisitiza upendo na kuthaminia katika kipindi hiki.

"Tunafahamu madhara yanayoweza kuletwa na mvua lolote linaweza kutokea, tuhifadhiane, jirani yako akipatwa na tatizo msaidie kujihifadhi yeye na familia yake,  hatuna budi kuangaliana katika mambo kama haya"

Mkoa wa Dar es salaam umeendelea kupata mvua nyingi kama ilivyo katika maeneo mbalimbali ya Nchi.