"MHE. RAIS ANATAMANI KILA KILA MWANAMKE MJAMZITO ARUDI NYUMBANI NA MTOTO" DC MUNKUNDA

Posted on: February 2nd, 2023

Na: Nassoro Rashid  

TMC Habari.

Ni kauli yake Mkuu wa Wilaya ya Temeke Mhe.Mwanahamisi Munkunda aliyoitoa leo Februari 02,2023 alipotembelea wodi ya Wazazi na Watoto wakati wa ziara yake katika Hospitali ya Rufaa ya Mkoa wa Temeke.

Akizungumza katika ziara hiyo ambayo iliambatana na zoezi la upandaji miti, Mhe. Munkunda amesema, maelekezo na msisitizo wa Rais Dkt. Samia Suluhu Hassan hatamani hata Mama mmoja apoteze mtoto wake anapokwenda kujifungua hospitalini, na kwamba Serikali inaendelea kuboresha sekta ya Afya ili kuimarisha utoaji huduma  kwa Wananchi wake.

"Kwahiyo Serikali inaendelea kuziboresha huduma mbalimbali za afya ili kila Mwanamke anayepata ujauzito anapokuja kujifungua apatiwe huduma bora na njema, anapoondoka kurudi nyumbani,aondoke akiwa salama yeye mwenyewe pamoja na mtoto wake." Alisema Mhe. Munkunda

Aidha Mhe. Munkunda amewashukuru Wananchi wa Temeke kwa mapokezi mazuri mara baada ya kufika, na ameahidi kuwa atawapa ushirikiano wa kutosha ili kujenga umoja na mshikamano wa kupanga maendeleo na kutatua changamoto za Temeke.

"Ndugu zangu muunganiko huu wa Wadau, Serikali na Watumishi unaonesha utayari ,na jinsi ambavyo hatutaki afya zetu zipate shida. Maana yake mkiungana kwenye jambo lolote lazima mfanikiwe, kwani hatuwezi kufanya kazi za kijamii kama afya zetu hazitakuwa vizuri, na mimi niwahakikishie Serikali inafanya uwekezaji mkubwa kwenye sekta ya  Afya. Kwa ujumla tunataka Tanzania iwe kituo cha matibabu na amani." Alisema Mkuu huyo wa Wilaya

Naye Mganga Mfawidhi wa Hospitali hiyo Dkt. Joseph Kimaro amesema katika kuboresha huduma za afya kwa sasa wana madaktari Bingwa 28 hivyo wanatarajia kuanza kutoa huduma Bingwa za mikojo na kusafisha damu, na wamedhamiria kumuunga mkono Mhe Rais kwa kutoa huduma bora za afya kwa Wananchi.