MHE.MTINIKA: SAFISHA PENDEZESHA DAR ES SALAAM NA WANANCHI WA KIMBANGULILE

Posted on: April 1st, 2023

Na: Sweetebtter Njige-Habari TMC

Katika kuendeleza kampeni ya Safisha Pendezesha Dar es Salaam iliyoasisiwa na mkuu wa mkoa wa Dar es Salaam Mheshimiwa Amos Makalla leo Aprili 01,2023 mstahiki meya wa halmashauri ya manispaa ya Temeke Mhe. Abdallah Mtinika ameendesha zoezi la usafi katika vichaka vya mto Mzinga,mtaa wa Kimbangulile kata ya Kibondemaji, eneo lililokua likitumiwa vibaya na baadhi ya Wananchi kufanya waovu.

Akizungumza baada ya zoezi hilo Mhe. Mtinika amempongeza Mhe. Makalla kwa kuanzisha kampeni hiyo iliyoleta msukumo wa ufanyaji usafi jijini humu, na kuwashukuru Wananchi wa Kimbangulile kwa kujitokeza na kusafisha eneo hilo la Umma.

"Nilivyopewa taarifa kuhusu hapa nilisema sisi tuna kampeni ya "Safisha Pendezesha Dar es Salaam" tukiishusha kampeni yetu hapa tiba itapatikana, mmejionea wenyewe pamesafishika, na tutaendelea kufanya finishing hapa, tutaweka mikakati ya kulinda hili eneo na kuweka mambo yenye tija badala ya kufuga vichaka. Haya ni matokeo chanya ya Safisha Pendezesha Dar es Salaam, naamini kuanzia leo sisi Wananchi tutakua walinzi wa eneo letu"

Kwa upande wake mwenyekiti wa mtaa huo Ndg. Abdulhaji Kessy amemshukuru Mhe. Mtinika, Wananchi na Watendaji wa Manispaa waliojitokeza katika kampeni hiyo kwa kazi kubwa waliyofanya ya kusafisha na kupendezesha eneo hilo.

"Hapa kulikua na matukio mengi ya uhalifu, Wananchi wakaona kuna haja ya kuwashirikisha Viongozi wetu, tukakubaliana na Meya akaja hapa, na leo tumefanikisha.

Wananchi wa mtaa wa Kimbangulile wameonesha kuwa  mstari wa mbele kupinga vitendo vya uhalifu vilivyokua vikifanyika katika eneo hilo  kwa kujitokeza kwa wingi leo kushiriki kampeni hiyo iliyoongozwa na Mstahiki  Meya Mtinika , huku wakiahidi kujitokeza kwa wingi wiki inayofuata.