MICHEZO IENDANE NA UZALENDO-DC MATINYI

Posted on: August 27th, 2023

Na: Joanita Joseph

TMC Habari

Mkuu wa Wilaya ya Temeke, Mhe. Mobhare Matinyi, leo Agosti 27, 2023 amekipongeza Chama cha Mbio za Mwendo wa Polepole (Temeke Jogging Association- TEJA), kwa kuandaa tamasha kubwa lililojumuisha mikoa yote ya Zanzibar na mikoa 12 ya Tanzania Bara.

Mhe Matinyi aliyekuwa akimwakilisha Mkuu wa Mkoa wa Dar es salaam, Mhe. Albert Chalamila amepongeza uzalendo uliooneshwa na chama hicho kwa kuandaa zoezi la upimaji afya pamoja na uchangiaji damu kwa kushirikiana na Hospitali ya Rufaa ya Temeke sambamba na kauli mbiu ya mwaka huu ya kupiga vita ukatili wa kijinsia kwa watoto na wanawake na kupinga mahusiano ya jinsia moja.

"pamoja na uanamichezo lakini mmejali pia wahitaji na hii ndivyo inavyotakiwa Michezo iendane na uzalendo"

Kabla ya kugawa vyeti kwa wadhamini na washiriki, Mhe. Matinyi amewasilisha salamu za Mhe. Rais wa Jamhuri ya Muungano wa Tanzania, Dkt. Samia Suluhu Hassan, akiwapongeza washiriki wa 'jogging' hiyo kwa kujali afya zao kupitia mazoezi, kuchangia damu na kupinga unyanyasaji wa kijinsia.

"Mhe. Mkuu wa Mkoa amenituma niwasilishe salamu za Rais wetu, Dkt. Samia Suluhu Hassan, kiongozi mwanamichezo, kwenu nyote washiriki " alisema Mhe. Matinyi.

Katika risala yao, TEJA kwa niaba ya mamia ya wakimbiaji, wamemwomba Rais ashiriki nao katika mbio hizo za mwendo wa pole pole katika siku za usoni.

Aidha, Mhe. Matinyi pia amewasilisha pongezi na shukrani kutoka kwa Waziri wa Afya, Ummy Mwalimu kwa wanamichezo hao kuchangia damu; Waziri wa Utamaduni, Sanaa na Michezo, Dkt. Pindi Chana, kwa wananchi hao kujali michezo; na pia kutoka kwa Waziri wa Maendeleo ya Jamii, Jinsia, Wanawake na Makundi Maalum, Dkt. Dorothy Gwajima, kwa washiriki hao kuunga mkono juhudi za serikali kupiga vita unyanyasaji kwa watoto na wanawake.

Tamasha hilo la mbio za mwendo wa polepole wa umbali wa kilomita sita limefanyika kuanzia Kigamboni kwenye daraja la Mwl.Julius Nyerere hadi Uwanja wa Uhuru, likiongozwa na Mhe. Matinyi pamoja na Mwenyekiti wa chama hicho Mhandisi Rashid Pazi na Makamu wake Janet Maseke.