MIKATABA YENYE THAMANI YA BILIONI 50 YASAINIWA KUBORESHA MIUNDO MBINU MANISPAA YA TEMEKE

Posted on: October 24th, 2024

Na: Joanita Joseph

Leo Oktoba 24, 2024 Historia mpya imeandikwa katika Nchi Yetu hasa katika Mkoa wa Dar es Salaam ambapo Waziri wa Nchi Ofisi ya Rais TAMISEMI Mhe. Mohamed Mchengerwa (Mb) katika Viwanja vya Mwembeyanga Temeke ameshuhudia Utiaji Saini wa takribani Mikataba 8 yenye thamani ya Shilingi Bilioni 190 (190,040,361,931.41) kwa ajili Ujenzi wa Barabara na Miundo mbinu muhimu katika halmashauri zote tano Jijini Dar es Salaam kupitia Mradi wa Uendelezaji wa Jiji la Dar es Salaam Awamu ya Pili (DMDP Phase Two)

Akizungumza katika hotuba Yake Mhe. Mchengerwa amesema

'Ujenzi wa mindombinu hii hakikisheni inazingatia thamani ya fedha na mahitaji ya Wananchi, tunapokwenda kwenye Ujenzi wa Masoko hakikisheni Masoko haya yawe ni yale yenye uhitaji kwa wananchi'

Miongoni mwa Mikataba hiyo Halmashauri ya Manispaa ya Temeke imepata mitakaba 2 yenye thamani ya Shilingi za Kitanzania 50,025,554,462 kwa ajili ya Ujenzi wa Barabara zenye Urefu wa Km 13.04.

Barabara hizo ni Nduguru 1.64 km, Masako 3.91 km, Maandazi 2 km,  Madaraja ya Miguu (Chaurembo 1 na 2), Songambele 0.32 km, Mwakalinga 1.07 km, Markas 0.48 km, Majimaji 0.32 km, Magorofani 0.31km, Igome/Yemen 0.85 km, Diwani 0.67 km, Keko Machungwa 0.57 km, na Basri O.9 km ambapo zote zitajengwa na Mkandarasi CRJE (EA) Ltd.

Mradi wa DMDP Awamu ya Pili uliobeba thamani ya Dola Milioni 438 za Marekani ni muendelezo wa yaliyofanywa katika Awamu ya Kwanza ya mradi huo katika Uendelezaji wa Jiji la Dar es Salaam hususan kwenye Uboreshaji na Ujenzi wa Miundombinu Muhimu ili kuhakikisha Wananchi wanapata huduma bora, ambapo kwa Awamu hii ya Pili Mradi huu unatarajia kuboresha Mtandao wa Barabara kwa Zaidi ya kilomita 250, kilomita 90 za mifereji mikubwa ya maji ya mvua, vituo 9 vya mabasi, masoko 18 na madampo matatu ya Kisasa.