MKURUGENZI MABELYA AFURAHISHWA NA UTENDAJI MAONESHO YA SABASABA

Posted on: July 9th, 2023

Na:Sweetbetter Njige-TMC

Mkurugenzi wa manispaa ya Temeke ndugu Elihuruma Mabelya ametembelea Maonesho ya 47 ya Kimataifa ya Biashara(Sabasaba ) kwa lengo la kuona huduma zinazotolewa na Idara mbalimbali za Manispaa hii.

Akizungumza mara baada ya kukagua mabanda hayo, Mkurugenzi Mabelya amesema amefurahishwa na huduma zinazotolewa na pamoja na ushiriki wa vikundi vya wajasiriamali waliowezeshwa kupitia mikopo ya 10% ya mapato ya ndani ya Halmashauri.

"Tunayofanya ni kueleza umma nini kinachofanyika ndani ya manispaa yetu hasa kwenye suala la ushiriki wa vikundi vilivyowezeshwa na mapato ya ndani ya Halmashauri,pia kutoa huduma zinazotolewa na manispaa yetu hapa hapa katika maonesho ya sabasaba mfano Bima ya Afya ya Jamii iliyoboreshwa(ICHF),mfumo mpya wa ukataji leseni za biashara-TAUSI na lengo letu kama Halmashauri ni kuwafikia Wananchi kwa kuwafuata na sio wao kutufuata".Alisema Mkurugenzi huyo

Aidha Mkurugenzi Mabelya amewataka watumishi wanaoshiriki maonesho hayo kuzingatia weledi wakati wa kutimiza majukumu yao kwa kujiepusha na vitendo vya rushwa

Mkurugenzi huyo amesisitiza kuwa rushwa ni adui wa haki, na kuwataka watendaji kutojihusisha na vitendo vya rushwa na badala yake wamsaidie Mhe.Rais Samia Suluhu Hassan mwenye nia ya dhati ya kuwahudumia watanzania.

Manispaa ya Temeke inaendelea kusogeza huduma karibu na Wananchi kwa kusogeza huduma zote zinazopatikana katika manispaa hiyo katika maonesho hayo ya 47 ya kimataifa ya biashara maarufu kama Sabasaba katika banda la Selous.