MKURUGENZI MABELYA ASHIRIKI HAFLA YA UTOAJI TUZO ZA WADAU WA USULUHISHI 2023

Posted on: January 16th, 2024

Na: Joanita Joseph 

TMC habari

Mkurugenzi wa halmashauri ya manispaa ya Temeke Ndg. Elihuruma Mabelya akiambatana na Mkuu wa idara ya huduma za sheria Manispaa ya Temeke Adv. Faraja Nakua leo Januari 16, 2024 amehudhuria hafla ya utoaji tuzo za wadau wa usuluhishi 2023, mahsusi kwa ajili ya kutambua michango ya wadau mbalimbali ndani na nje ya mahakama waliofanikisha utatuzi wa migogoro kwa njia mbadala ya usuluhishi zilizotolewa na Mahakama kuu Tanzania kituo cha usuluhishi katika ukumbi wa Julius Nyerere International convention Center (JNICC) jijini Dar es salaam.

Sambamba na utoaji tuzo hizo washiriki walipatiwa elimu ya utatuzi mbadala wa migogoro (Alternative Dispute resolution (ADR) ikiwemo aina mbalimbali za usuluhushi kulingana na aina za kesi pamoja na faida na hasara zake. Lakini pia kumefanyika mijadala mbalimbali iliyoendeshwa na wabobezi katika sheria ikiwemo vikwazo vya kimuundo vinavyoathiri mafanikio ya usuluhishi, na jinsi gani mfumo wa usuluhishi unaweza kuimarishwa hapa Nchini.

Hata hivyo wabobezi hao wamesisitiza ni vema mfumo wa usuluhishi na upatanishi (mediation) ukahamasishwa zaidi kutumika badala ya kuvutana kwa hoja mahakamani( litigation) ili kuokoa muda unaotumika katika uendeshaji wa kesi kwa njia ya kawaida na kupunguza mrundikano wa mashauri mahakamani.

Hafla hiyo iliyobeba kauli mbiu ya "kwanini sio upatanishi" ambapo Mgeni rasmi alikuwa ni Jaji mkuu wa Tanzania Profesa Ibrahim Juma Hamis imehudhuriwa pia na waheshimiwa majaji, manaibu wasajili, mahakimu wafawidhi, mawakili wa serikali na wa kujitegemea, makatibu wakuu, wakurugenzi wa taasisi mbalimbali za serikali na za kibenki, pamoja na viongozi mabaraza ya ardhi, wilaya na kata.