MKURUGENZI MABELYA AWAKUTANISHA VIJANA KWENYE MICHEZO, ATOA WITO KUTUNZA MAZINGIRA

Posted on: May 19th, 2024

Na:Shalua Mpanda-TMC

Mkurugenzi wa manispaa ya Temeke ndugu Elihuruma Mabelya amekutana na wanamichezo pamoja na wasanii wa muziki wa singeli kwa lengo la kufikisha ujumbe kwa Jamii kuhusu utunzaji wa mazingira na kushiriki Uchaguzi wa Serikali za Mitaa unaotarajiwa kufanyika mwezi Oktoba mwaka huu.

Akizungumza leo hii Mei 19,2024 mara baada ya kukabidhi vifaa vya michezo kwa wanamichezo na wasanii hao katika viwanja vya Mwembeyanga Temeke, Mkurugenzi huyo amesema michezo inakutanisha watu wengi na ni rahisi kufikisha ujumbe kwa Jamii kupitia michezo na sanaa.

"Tunaunga mkono juhudi za Serikali katika kukuza na kuendeleza michezo nchini, mheshimiwa Rais Samia Suluhu Hassan amekuwa mstari wa mbele kuhakikisha tunasonga mbele kwenye sekta hii ya michezo.....Na sisi kama Manispaa tumeamua tufikishe ujumbe wa kutunza mazingira na kushiriki Uchaguzi kwa njia hii".Alisisitiza Mabelya.

Aidha amekabidhi vifaa vya michezo zikiwemo jezi na mipira kwa timu ya mpira wa kikapu ya Temeke pamoja na vifaa vya mazoezi kwa bondia mkongwe hapa nchini Rashid Matumla "Snake Boy" ili kuhamasisha mchezo wa ngumi wilayani Temeke.

Baadhi ya wasanii ambao nao walipewa zawadi kwa kutambua mchango wao katika Jamii wamemshukuru Mkurugenzi huyo kwa kuwa mstari wa mbele kutoa motisha kwao hali inayowapa chachu ya kuendelea kufanya vizuri.

"Kiukweli Serikali inatupa nguvu sana ya kupambana,Sasa hivi tunaitwa kwenye shughuli za Serikali na unapoona mpaka viongozi kama hawa wanakuita kukupa zawadi kama hizi inapendeza sana".Alisema Kidene Fighter(msanii wa Singeli).

Mkurugenzi Mabelya ameahidi kuendelea kuwaunga mkono kila mara atakapopata nafasi ya kufanya hivyo na amesema lengo la viongozi wa Manispaa akiwemo Mstahiki Meya Abdallah Mtinika na Baraza la Madiwani ni kuona Temeke ambayo ni kitovu cha michezo inakuwa na timu zinazoshiriki ligi ngazi za juu.