MKURUGENZI TEMEKE AKABIDHI VISHIKWAMBI KWA MADIWANI

Posted on: April 12th, 2023

Mkurugenzi wa manispaa ya Temeke ndugu Elihuruma Mabelya amekabidhi vishikwambi (Tablets) kwa Mstahiki meya  Abdallah Mtinika kwa niaba ya madiwani wote wa Halmashauri hii  kwa ajili ya matumizi ya kiutendaji na kuwapatia mafunzo ya namna sahihi ya kutumia vishikwambi hivyo.

Akizungumza wakati wa Makabidhiano hayo mkurugenzi Mabelya amesema lengo kubwa la kununua vishikwambi hivyo ni kuendana na matumizi ya teknolojia na kupunguza gharama za matumizi ya karatasi na usambazaji wa makabrasha.

"Matumizi ya vishikwambi hivi yatasaidia kuokoa gharama, kupunguza muda uliokua ukitumika kusambaza makabrasha na kuwezesha watoa huduma wetu kufanya majukumu mengine katika kuwahudumia Wananchi. Tunategemea sasa taarifa za vikao zitatumwa kwenye vishikwambi na kuwafikia waheshimiwa madiwani kwa wakati".Alisema Mkurugenzi huyo

Kwa upande wake Mhe. Mtinika amempongeza Mkurugenzi huyo na Watumishi kwa hatua hiyo kubwa na kufanikiwa kuanza kutumia teknolojia katika utendaji.

"Tujipongeze sisi sote, sisi kwa umoja wetu tumeweza kupiga hatua hii, mkurugenzi hongera sana, tumefurahi kuifikia teknolojia, naamini madiwani wenzangu tutakutumia vishikwambi hivi ilivyokusudiwa,tuvitunze ili vidumu kwa muda mrefu. Nisisitize, kwa mujibu wa kanuni taarifa zozote zinazomfikia diwani kabla hazijaenda kwenye baraza ni "Siri",  tuwe makini kulinda taarifa, teknolojia inataka umakini mkubwa". Alisema Mhe.Mtinika

Manispaa ya Temeke ni miongoni mwa manispaa chache nchini ambazo madiwani wake wameanza kutumia teknolojia katika shughuli zao za kila siku.