MKURUGENZI TEMEKE AONYA MADALALI SOKO LA MTONI.

Posted on: April 1st, 2022

Likiwa limekamilika kwa asilimia mia moja soko jipya la Mtoni liliojengwa kupitia mradi wa uboreshaji wa jiji la Dar es salaam(DMDP),Mkurugenzi wa manispaa ya Temeke Elihuruma Mabelya ametoa onyo kwa wanaotaka kutumia soko hilo kinyume cha utaratibu.

Onyo hilo amelitoa leo Aprili 1,2022 alipokuwa akikagua kabla ya kukabidhiwa soko hilo na mkandarasi aliyejenga soko hilo lililogharimu zaidi ya shilingi bilioni 1.4.

"Kuna tabia ya wafanyabiashara kuchukua vizimba na kuvikodisha kwa wenzao,kwa hili sitalivumilia na mimi kama kiongozi wa Halmashauri nasema  madalali soko la Mtoni hapana".Alisema Mabelya

Akifafanua zaidi Mkurugenzi huyo amesema kuwa soko hilo litakuwa na uwezo wa kuhudumia wananchi 395,353 wa kata hiyo ya Mtoni na kata za jirani.

Soko hilo lenye jumla ya vizimba 209 pamoja na maeneo ya wazi linatarajiwa kuwa chanzo kikubwa cha mapato huku ikikadiriwa kwa mwezi kukusanya zaidi ya milioni 20 huku kwa mwaka litarajiwa kukusanya milioni 251.

Mwenykiti wa soko hilo Bw Hemed Pazi ameishukuru Serikali kwa kuboresha mazingira ya kufanyia biashara tofauti na ilivyokuwa mwanzo.

Ni wakati muafaka sasa kwa wananchi na wafanyabiashara hao kutunza miundombinu ya soko hilo hili liweze kuleta tija.