Mkurugenzi Temeke Ataka Utunzaji Miundo Mbinu

Posted on: May 10th, 2019

Mkurugenzi wa manispaa ya Temeke Ndg. Lusubilo Mwakabibi akisaini kitabu cha wageni mara baada ya kuwasili katika shule ya msingi Marten Lumbanga kwa ajili ya Ukaguzi Aliyesimama katikati ni mwalimu mkuu wa shule hiyo Mwl. Mgoha Mwende.

Baadhi ya majengo ya shule ya msingi Marten Lumbanga kama yanavyoonekana.Shule hii ni mpya, imeanza kutumika rasmi 29/04/2019.

Afisa elimu Msingi ( Aliyesimama) Mwl. Dafroza Ndalichako akitoa utambulisho wakati wa ziara ya Mkurugenzi shuleni  MartenLumbanga Aliyekaa upande wa kushoto ni Mkurugenzi wa manispaa ya Temeke Ndg. Lusubilo Mwakabibi.

Wajumbe wa kamati ya ujezi wa shule ya msingi Marten Lumbanga, walimu pamoja na wataalamu walioambatana na Mkurugenzi wakimsikiliza Mkurugenzi akitoa maelekezo mara baada ya ziara yake katika shule hiyo

Waliosimama ni wajumbe wa kamati ya ujenzi  wa shule ya msingi Marten Lumbanga  wakati wa utambulisho.

Waliosimama ni walimu wa shule ya msingi Marten Lumbanga  wakitambulishwa wakati wa ziara ya Mkurugenzi wa Manispaa.

...........HABARI KAMILI...............

Mkurugezi mtendaji wa halmashauri ya  manispaa ya Temeke ndugu Lusubilo Mwakabibi amewataka walimu wa shule ya msingi Marten Lumbanga iliyopo mtaa wa Majimatitu B kata ya Kilungule kutunza miundo mbinu ya shule hiyo.Mwakabibi ametoa maelekezo hayo wakati alipotembelea shule hiyo  mwanzoni mwa  wiki .

Akizungumza mara baada ya kukagua mazingira ya shule hiyo ambayo imeanza kutumika rasmi tarehe 29/04/2019 Mwakabibi amesema ''shule ni nzuri, majengo yanapendeza,lakini ili yaendelee kupendeza kama yanavyoonekana sasa, inahitaji kutunzwa.Walimu simamieni utunzwaji wa majengo na samani za shule hii"

Kadhalika Mwakabibi ametaka maboresho zaidi yafanyike ili mazingira ya shule hiyo yawavutie zaidi  na yawawezeshe wanafunzi  kusoma  wakiwa huru.Ameelekeza sehemu za kuboresha ,sehemu hizo ni chooni ,ambapo ametaka maeneo ya kunawia mikono yapauliwe kwa bati ili wakati wa mvua wanafunzi wasinyeshewe. Eneo lingine ni madarasani ambapo ameagiza madawati yaongezwe kulingana na idadi ya wanafunzi, dawati moja likaliwe na  wanafunzi  watatu, vile vile madawati  ya wanafunzi wa darasa la 1 hadi la 3 yatengenezwe  kwa vipimo vitaendana na vimo vyao  ili kuwaondolea adha ya  kuinama wakati wa kuandika.

Aidha ameelekeza kuhusu ujenzi wa ofisi ya mwalimu mkuu pamoja na njia  za zege  kwenye eneo la katikati la shule hiyo ili kuzuia maji kutuama na kusababisha usumbufu kwa wanafunzi .Ili kuhakikisha kwamba maboresho hayo yanafanyika , amemuagiza kaimu mkuu wa idara ya ujenzi wa manispaa ya Temeke kupima na kumpelekea hesabu ya vifaa vinavyohitajika kazi ianze mara moja.

Katika hatua nyingine Mwakabibi amezipongeza kamati  zilizosimamia ujenzi wa shule hiyo ambapo amesema kwamba kamati hizo zimefanya kazi nzuri sana inayopaswa kupongezwa. Sambamba na kuipongeza  kamati,Mwakabibi  pia amempongeza afisa Elimu Msingi kwa jitihada zake za kufuatilia kwa karibu kuhakikisha kwamba shule hiyo inakamilika.

Shule ya msing Matern Lumbanga  ilijengwa kwa lengo la kupunguza mlundikano wa wanafunzi katika shule ya msingi Majimatitu . Ujenzi  wake umegharimu kiasi cha sh. Milioni 324, fedha hizo  zimetolewa na wizara ya elimu, na zimewezesha kujengwa kwa  vyumba 14 vya madarasa, vyoo matundu 40. Hadi sasa ina jumla ya wanafunzi 1,035,idadi hiyo inajumuisha wanafunzi wa darasa la awali hadi darasa la tatu.

...........MWISHO.............