Mkurugenzi Manispaa ya Temeke afanya ziara Mashuleni

Posted on: January 8th, 2020

“WALIMU WAKUU MANISPAA YA TEMEKE SIMAMIENI SHULE ZENU VIZURI” MD  LUSUBILO  MWAKABIBI.

Mkurugenzi wa Manispaa ya Temeke Ndg Lusubilo Mwakabibi amewataka wakuu wa shule katika Manispaa ya Temeke kusimamia vizuri shule wanazoziongoza kwa kuhakikisha miundombinu inayowezesha mazingira ya kujifunzia na kufundishia inakuwa vizuri katika Shule zote za Manispaa hiyo.

Ameyasema hayo leo katika ziara yake ya kutembelea baadhi ya shule za Manispaa hiyo kujionea uhalisia wa Mazingira ya Shule kwa kipindi hiki cha mwanzo wa mwaka ambapo shule zimefunguliwa.

Mkurugenzi wa Manispaa ya Temeke Ndg Lusubilo Mwakabibi akiongea na baadhi ya walimu alipozuru shule ya Sekondari Taifa ambayo ilitokana na shule ya Msingi Kibasila Jijini Dar es Salam.

Akiwa katika shule ya Sekondari Taifa ambayo ni shule mpya iliyobadilishwa kutoka shule ya Msingi Kibasila alikagua mazingira ya shule ikiwemo vyumba vya Madarasa, Matundu ya Vyoo, Madawati, mazingira kwa ujumla na baadae alipata wasaa wa kuongea na wanafunzi wa Shule hiyo.

Akiongea na Wanafunzi hao amewataka wanafunzi kusoma kwa bidii ili waweze kutimiza ndoto zao  kwa kuwa wao ndio viongozi watarajiwa. Pia amewahimiza walimu kutoa adhabu ya viboko kwa wanafunzi ili wawe na tabia nzuri itakayopelekea kuinua taaluma za wanafunzi hao.

Baadhi ya Wanafunzi walieleza changamoto zinazowakabili mbele ya Mkurugenzi  ikiwa ni pamoja na ukosefu wa Walimu wa masomo ya Sayansi mfano Fizikia, Biologia,  na akamuagiza afisa Elimu Sekondari kuhakisha anawapatia  walimu wa masomo hayo mapema iwezekanavyo.

Mmoja wa Wanafunzi wa shule hiyo akimueleza Mkurugenzi changamoto ya uhaba wa walimu wa sayansi katika shule hiyo na papohapo Mkurugenzi akamuagiza Afisa elimu Sekondari Bi Neema Magembe kulifanyia kazi.

Aidha Mkurugenzi wa Manispaa ameuagiaza uongozi wa Shule ya Sekondari  Taifa hadi ifikapo Jumatatu tarehe 13/01/2020 mtandao  maji uwe umefika katika shule hiyo nvyoo vya shule viwe na maji wakati wote ili kuepuka magonjwa ya milipuko.

Ifahamike kuwa shule ya Sekondari Taifa ni shule mpya ambayo ilibadilishwa kutoka Shule ya Msingi Kibasila na kuwa Sekondari  inavyumba vya madarasa 23 ,Matundu ya vyoo vya wanafunzi 25 na kwa sasa ina wanafunzi kuanzia kidato cha kwanza hadi cha pili.

Katika picha ni mwonekano wa vyumba vya madarasa na baadhi ya vyoo vilivyojengwa katika shule hiyo ya Sekondari Taifa ambayo ilibadilishwa kutoka shule ya Msingi Kibasila.

Halimashauri ya Manispaa ya Temeke imedhamiria kuleta Mabadiliko makubwa katika elimu kwa kuhakikisha inaboresha miundombinu ya shule zote za msingi na Sekondari.