Mkutano wa Baraza la madiwani Manispaa ya Temeke

Posted on: December 11th, 2019

BARAZA LA MADIWANI MANISPAA YA TEMEKE LAHIMIZA UWAZI, UADILIFU NA KUTENDA HAKI KWENYE ZOEZI  LA UGAWAJI  VIZIMBA KATIKA MASOKO  MAPYA.

Hayo yamejiri leo katika Baraza la Madiwani Manispaa ya Temeke lililoketi ukumbi wa mikutano Iddy Nyundo Makao makuu ya Manispaa hiyo Jijini Dar es Salaam.

Katika kikao hicho cha Baraza la Madiwani kikiongozwa na Mstahiki Meya wa Manispaa ya Temeke Mhe Abdallah Chaurembo na Katibu wake Kaimu Mkurugenzi wa Manispaa Ndg Deogratius Lukomanya kilikuwa na ajenda mbalimbali ambazo ziliwasilishwa na kupitishwa na Baraza kwa ajili ya Utekelezaji.

Moja ya ajenda ilikuwa ni kupokea taarifa za kamati anuai ikiwemo Kamati ya Fedha, Mipango Miji na Mazingira, Kamati ya Uchumi Afya na Elimu na taarifa za Masoko yanayojengwa na Halmashauri ya Manispaa kupitia mradi wa DMDP.

Akitoa taarifa mbele ya Baraza hilo  kwa niaba ya Mkurugenzi wa Manispaa Mratibu wa mradi wa DMDP Ndg Edward Haule alisema mradi umejenga Barabara za lami katika maeneo mbalimbali ya wilaya ya Temeke, vituo vya afya na  vituo vya Daladala. 

Kwa upande wa masoko tayari tunayo masoko ambayo yameshakamilika na kwa sasa tumeshaanza kutoa fomu za kugawa vizimba na mwitikio wa watu kuchukua fomu  ni mkubwa hivyo nichukue fursa hii kulihakikishia Baraza la madiwani kuwa mchakato wa kugawa vizimba utafanyika kwa uwazi, kwa kuzingatia taratibu na kanuni tulizojiwekea kwa kushirikiana na waheshimiwa madiwani katika maeneo husika.

Baadhi ya wataalam wakifuatilia kwa makini wakati wa Baraza hilo leo katika ukumbi wa mikutano Manispaa ya Temeke.

Aidha Baraza la Madiwani Manispaa ya Temeke limeridhia kuanza kwa mchakato huo wa kugawa vizimba lakini kipaumbele kiwe kwa wafanyabiashara wa maeneo husika na wakazi wa Temeke kwa ujumla wake na si vinginevyo.