MKUU WA MKOA DAR ES SALAAM AWACHARUKIA WAFANYABIASHARA MBAGALA

Posted on: September 2nd, 2021

Mkuu wa mkoa wa Dar es salaam Mheshimiwa Amos Makalla ametoa agizo kwa wafanyabiashara katika eneo la Mbagala wanaofanya biashara zao katika sehemu ya ujenzi wa barabara ya mwendokasi.

Akizungumza wakati wa mkutano wake na wananchi wa wilaya ya Temeke katika viwanja vya Zakhem Mbagala,Mhe.Makalla amewataka wafanyabiashara hao kutotumia vibaya uhuru wa kufanya biashara ambao Serikali imeutoa kwa wafanyabiashara nchini.

"Uhuru bila utaratibu ni fujo....Nilikuja hapa mwenyewe nikawaambia wapishe eneo hilo la ujenzi ili wakandarasi wafanye kazi hiyo kwa muda maana Serikali inatoa pesa nyingi sana kwenye mradi huu lakini hawakutoka,akaja DC(Mkuu wa Wilaya) sasa nawaambia na nina imani sauti hii inafika kwao maana hapa sio mbali;nataka watoke hapo wapishe ujenzi uendelee".Aliagiza Mkuu huyo wa Mkoa.

Ujenzi huo wa barabara ya mwendokasi awamu ya pili unaoanzia Mbagala kuelekea Gerezani ni utekelezaji wa baadhi ya miradi mikubwa inayotekelezwa na Serikali umekuwa ukichelewa na moja kati ya malalamiko ya mkandarasi ni baadhi ya wafanyabiashara kuingia eneo la ujenzi.

Katika hatua nyingine Mkuu huyo wa Mkoa ameendelea kusikiliza kero mbalimbali katika utaratibu aliojiwekea wa kutembelea wananchi wa Mkoa huo huku akiwa tayari ameshatembelea majimbo matatu ya uchaguzi ya Kinondoni,Ubungo na Temeke ambapo kesho anatarajia kukutana na wananchi wa jimbo la Kigamboni.

"Hii ni njia nzuri ya kupunguza mabango ya wananchi kwa viongozi wakuu wa nchi,nawashauri viongozi wenzangu tuwe na tabia ya kuwafuata wananchi kwenye maeneo yao".Alishauri Mkuu wa Mkoa

Suala la maendeleo ni la kila mmoja na hatuna budi kila mmoja kwa nafasi yake kusimaa kuhakikisha maendeleo ya eneo husika na ya nchi kwa ujumla yanasonga mbele.