Mkuu wa Mkoa wa Dar es salaam Mh. Paul Makonda afanya ziara katika Wilaya ya Temeke kukagua utekelezaji wa miradi ya maendeleo.

Posted on: April 17th, 2019

Mkuu wa Mkoa wa Dar es salaam Mh. Paul Makonda afanya ziara katika Wilaya ya Temeke kukagua utekelezaji wa miradi ya maendeleo inayotekelezwa kwa fedha toka Serikali kuu, Mapato ya ndani ya ndani na fedha za wadau wa ndani na nje.

 Ziara hiyo ni mwendelezo wa ukaguzi wa miradi yote ya maendeleo katika halmashauri zote za Mkoa wa Dar es salaam ili kujiridhisha na taarifa anazopokea na  thamani halisi ya fedha ilivyotumika.

Katika ziara hiyo Mh. Mkuu wa Mkoa  amepongeza kasi ya utekelezwaji wa miradi hiyo na namna inavyosimamiwa, pamoja na mambo mengine alitembelea na kujionea ujenzi wa vyumba vya madarasa katika shule ya sekondari Kijichi,Malela, ukaguzi wa miundombinu ya maji Charambe, pamoja na ujenzi wa ghorofa mbili zahanati ya Yombo Vituka.

Akiwa katika zahanati ya Yombo Vituka Mh. Mkuu wa mkoa alipongeza uongozi wa Manispaa ya Temeke kwa kuweka vipaombele kwa wananchi wake na kuamua kuwekeza fedha zake na kujenga zahanati kubwa ya mfano tena kwa mapato ya ndani, ameagiza kasi ya utekelezaji wake iongezwe ili ikamilike kwa wakati na huduma zianze kutolewa.

Katika hatua nyingine Mh Makonda ameshauri wakandarasi wazawa kupewa kipaombele katika tenda mbalimbali zinazotangazwa ili kuonesha ufanisi wao katika kazi na kuongeza ujuzi kupitia wakandarasi wa nje.

Mwisho kabisa Mh. Makonda alifurahishwa na namna Manispaa ya Temeke ilivyojipanga kielimu kuhakikisha kila mtoto anapata elimu iliyo bora, na alisema wazi kuwa amefurahishwa kwa ujenzi wa mabweni mawili ya wanafunzi wenye uoni hafifu, pamoja na hayo aliahidi kuwasomesha kidato cha tano watoto mia wa kike wa Mkoa wa Dar es salaam watakaofaulu masomo ya sayansi na kulipiwa gharama zote za masomo pamoja na mahitaji yao.