Mkuu wa Wilaya ya Temeke Mh.Felix Lyaniva afungua mafunzo ya awali ya usimamizi na ufuatilia wa mikopo bila riba kwa Madiwani

Posted on: March 13th, 2019

Mkuu wa Wilaya ya Temeke Mh.Felix Lyaniva leo amefungua mafunzo ya awali ya usimamizi na ufuatiliaji wa mikopo bila riba kwa waheshimiwa  Madiwani  wa Manispaa ya Temeke.

Alitoa salamu za shukrani kwa ndugu wajumbe wa mafunzo hayo Mh. Lyaniva aliwataka kuzingatia mafunzo hayo kwani ndio chachu ya ukombozi kwa wananchi watakaopelekewa habari hizo za namna ya kujikomboa kiuchumi.

Lyaniva aliwasisitiza waheshimiwa kuhakikisha wananchi katika maeneo yao wananufaika na mikopo hii hususani Wanawake,Vijana na walemavu  kwani hawa ndio walengwa halisi wa mikopo hii.

Nae Mstahiki Meya wa Manispaa ya Temeke Mh. Abdallah Chaurembo aliwataka wajumbe kuhakikisha vikundi vya ujasiriliamali vinaundwa ili kupata umoja ambao utakuwa ni rahisi kukopesheka.

“Ili kupata mikopo hii kwa urahisi ni vema kuwasisitiza wahitaji kujiunda katika vikundi ili waweze kukopesheka kwa urahisi na iwe rahisi kufanya ufuatiliaji wa ukuaji wa shughuli zao za kujikwamua kiuchumi”alisema

Sambamba na hilo aliwasihi kuhakikisha wananchi wanakuwa na uelewa wa biashara wanayotaka kufanya na kuitafakari kwa kina kabla ya kufanya maamuzi ya kuchukua mkopo.

Nae mwezeshaji wa mafunzo hayo toka Shule ya biashara Chuo Kikuu cha Dar es salaam Dr.A.I .Shimba alitoa somo juu ya uendeshaji wa shughuli za ujasiriamali, Umuhimu wa Halmashauri kusaidia wajasiriamali pamoja na faida za ujasiriamali kwa Halmashauri husika.

“Ni vema wajasiriamali wakafanya uchunguzi kuhusu biashara mbalimbali kabla ya kujitosa kuanza kuifanya,hii itasaidia kujua biashara gani  mlengwa ataimudu pindi akipata mkopo wake lakini sambamba na hilo Halmashauri husika ni vema kujiridhisha na wanufaika wa mikopo hiyo ili iwe chachu ya maendeleo katika maeneo yao”

Akihitimisha mafunzo hayo mtaalamu wa ushauri kuhusu masuala ya Mikopo na Ujasiriamali Ndugu J.S.Bwana , alitoa somo juu ya mikopo ya vifaa kwa Wanawake,Vijana na Walemavu katika hatua za kuleta maendeleo endelevu.

‘Ni vema wananchi waelimishwe kuhusu mikopo na aina ya mikopo sambamba na vyanzo mbalimbali  vya upatikanaji wa mikopo ili kuhakikisha mkopo unaelekezwa sehemu sahihi na kuondoa dhana ya majuto pindi mambo yanapoharibika’.Alisisitiza J.Bwana

Naimani muda si mrefu watajitokeza wananchi wakiomba mikopo hii,chamsingi ni vigezo na masharti yazingatiwe ili kuondoa mkanganyiko kwa wananchi wahitaji, na ni vema wawe wahusika halisi wa mkopo huo

“Hakuna kitu kibaya kama kuchukua mkopo bila malengo,ni wazi kuwa baada ya muda majuto yatakukumba tu kwakuwa huna dira katika fedha hiyo,hivyo ni vema kujitathmini unapochukua mkopo unaufanyia nini na wananchi wenu katika maeneo mtokapo muwape elimu hii kabla ya kuamua kuchukua mkopo mahali popote”.

Ndugu J. Bwana alibainisha vifaa vya mkopo vinavyotolewa ni mitambo ya kufyatulia matofali,vyerehani,mashine ya kutengenezea viatu,ununuzi wa bajaji pamoja na Ufugaji  wa  samaki.

Ikumbukwe kuwa Halmashauri ya Manispaa ya Temeke imejiridhisha na utaratibu  wa mikopo kwa  njia ya vifaa, Hivyo timu ya wataalamu wa Halmashauri itakuwa karibu na waliokopeshwa ili kuhakikisha fedha zinarejeshwa kwa wakati na wakopaji kunufaika na kuhakikisha  miradi inakuwa endelevu kwa kuwezesha ufanisi huo ambao  utaiwezesha Manispaa kutekeleza kauli mbiu ya serikali ya awamu ya tano ya “ Hapa kazi tu” ikiwa na dhana nzima ya kuwataka wananchi kufanya kazi kwa bidii.