MMEFANYA KAZI KUBWA NA YA KIZALENDO-MHE. MAPUNDA

Posted on: November 3rd, 2023

Na: Sweetbetter Njige-TMC Habari

Mkuu wa wilaya ya Temeke mheshimiwa Sixtus Mapunda amefunga zoezi la uchangiaji damu kwa kushiriki zoezi hilo na wadau wa afya kampuni ya Toyota Tanzania.

Akizungumza leo hii Novemba 3 katika hafla fupi iliyofanyika katika ofisi za Toyota zilizopo barabara ya Nyerere manispaa ya Temeke, Mhe.Mapunda ameupongeza uongozi wa Kampuni ya Toyota wafanyakazi wa Kampuni hiyo pamoja na washiriki kutoka kampuni za Gardaworld na SPC Tanzania kwa utu walioonesha kwa Watanzania.

"Niwapongeze kwa kitendo cha ushujaa mlichokifanya kwa kuwa wote tunatambua hakuna kiwanda cha kutengeneza damu bali mwili wa binadamu pekee, mnajali wateja wenu na Watanzania kwa ujumla kwa kuchangia damu".Alisema Mkuu huyo wa Wilaya

Aidha Mhe. Mapunda amesisitiza elimu ya faida za kuchangia damu itolewe ili kuondoa fikra potofu kwa baadhi ya watu ambao huhusisha zoezi hilo la uchangiaji damu na suala la imani.

"Kuna faida nyingi mtu anapochangia damu lakini tunapohamasisha watu huwa hatuzisemi, baada ya kuzifahamu leo kwa mara ya kwanza nimeamua nitachangia damu, inatupasa kuzitaja faida hizo ili kubadili fikra za watu na kuokoa maisha ya watu wengi zaidi".Aliongeza Mhe.Mapunda

Kwa upande wake Meneja mkuu wa Toyota ndugu William Kadiva amewapongeza watumishi wa Toyota kwa kuchangia damu na kueleza kuwa kurudisha kwa jamii ni desturi ya Kampuni hiyo.