MRADI WA DMDP AWAMU YA PILI MBIONI TEMEKE

Posted on: July 17th, 2024

Na: Joanita Joseph -TMC Habari

Ni maandalizi ya Mradi wa Dar es salaam Metropolitan Development Project (DMDP) Awamu ya pili ambapo leo Julai 17, 2024 wakandarasi wametembelea miundombinu inayotarajiwa kuendelezwa ikiwemo barabara na vivuko kupitia Mradi huo ili waweze kujaza zabuni zilizotangazwa kwa ajili ya kuwapata wakandarasi watakaotekeleza jukumu hilo.

Mheshimiwa Mbunge wa Jimbo la Temeke Mhe. Dorothy Kilave naye alipata wasaa wa kuungana na timu hiyo kujionea mikakati pamoja na kutoa maelekezo kadhaa kwa Manufaa ya Wananchi wa Jimbo la Temeke.

Akizungumza akiwa katika barabara ya Pendamoyo, Temeke Mhe. Kilave amesema

"Uboreshaji wa barabara na vivuko utaimarisha uchumi kwa wanaTemeke lakini hata athari za mafuriko pia zitapungua kwa kiasi kikubwa, mradi huu utakwenda kuboresha maisha ya wanaTemeke, mimi niwatakie kila la kheri tukachape kazi" alisema Mhe. Kilave

Miongoni mwa barabara zilizotembelewa leo ni pamoja na Masuliza, kilimahewa, konisaga, kurasini, taningira, uhasibu, pendamoyo, pendamoyo 1, kizota, Mandera, lushoto, mkumba, pamoja kivuko cha shehe Mucki, Baajun, Mpeta na Mdeda.

Ikumbukwe kuwa mnamo Februari 21, 2024 Serikali ya Jamhuri ya Muungano wa Tanzania na Benki ya Dunia zilisaini Mkataba wenye thamani ya Euro 361.1 sawa na Bilioni 988.083 kwa ajili ya kuboresha Miundombinu muhimu ya umma na huduma jijini Dar es Salaam ikiwemo wilayani Temeke ambapo takribani barabara zenye jumla ya kilomita 52.71 zinatarajiwa kuboreshwa kwa kiwango cha lami/zege pamoja na ujenzi wa vivuko 8 wilayani Temeke.

Ujio wa Mradi huu (DMDP Phase 2) utakwenda kubadilisha taswira ya Manispaa ya Temeke na kurahisisha usafiri kwa Wananchi kutoka eneo moja kwenda jingine jambo litakaloongeza chachu katika ukuaji wa vipato vyao na pato la Taifa kwa ujumla.