Msimamizi wa Uchaguzi Temeke Atoa Maelekezo ya Uchaguzi

Posted on: September 23rd, 2019

Msimamizi wa uchaguzi,ambaye pia ni mkuu wa kitengo cha sheria,wakili Salum Ally Papen, ametoa maelekezo ya uchaguzi wa wenyeviti wa mitaa na wajumbe wa kamati za mitaa katika halmashauri ya manispaa ya Temeke.Wakili Papen ametoa maelekezo hayo leo mchana, kwenye ukumbi wa manispaa,mbele ya watendaji wa kata na mitaa.

Katika maelekezo hayo wakili Papen ametaja tarehe ya uchaguzi,mahali uchaguzi utakapofanyika na muda wa uandikishaji ,amesema kwamba uandikishaji wa wapiga kura utafanyika kwa siku 7,ambazo ni kuanzia tarehe 8- 14/10/2019 saa 2:00 asubuhi hadi saa 12 jioni.Uchaguzi utafanyika katika vituo vilevile  vilivyotumika katika uandilishaji wa wapiga kura.

Wakili Papeni amewataka wananchi wote wa manispaa ya Temeke  wenye umri wa miaka 18 na zaidi kushiriki katika uchaguzi.

Kadhalika amewataka wakazi wa Temeke wenye umri wa miaka 21 na zaidi wanaotaka kugombea nafasi ya uenyekiti wa mtaa au ujumbe wa kamati za mtaa kuchukua fomu za kugombea zinazopatikana kwenye ofisi za wasimamizi wasaidizi wa  uchaguzi katika mitaa.

Wakili Papen pia ameelekeza zinapopatikana fomu za kugombea nafasi,ambapo amesema kwamba fomu hizo zitatolewa katika ofisi za wasimamizi wasaidizi wa uchaguzi katika mitaa kuanzia tarehe 29/10/2019 hadi tarehe 4/11/2019 kuanzia saa 1:30asubuhi ,hadi saa 10:00 jioni.

Aidha wakili Papen ameelekeza kuhusu tarehe za uteuzi,pingamizi,usikilizaji wa rufaa na muda wa kampeni,amesema kwamba uteuzi wa wagombea utafanyika tarehe 05/11/2019 saa 10:00 jioni.Pingamizi dhidi ya uteuzi zitawekwa tarehe 05/11/2019 hadi tarehe 06/11/2019, uwekaji wa pingamizi utakwenda sambamba na usikilizaji wa pingamizi na utoaji maamuzi.Usikilizaji wa rufaa dhidi ya uteuzi utafanyika tarehe 5/11/2019 hadi tarehe 8/11/2019.Mikutano ya kampeni itafanyika kwa siku 7,  tarehe 17/11/2019 hadi tarehe 23/11/2019 ,muda wa kampeni ni saa 2:00 asubuhi hadi saa 12:00 jioni.

Katika hatua nyingine wakili Papen amewataka wananchi wote wa manispaa ya Temeke ambao wana vitambulisho vya kupiga kura,na ambao hawana vitambulisho hivyo  kujitokeza kujiandikisha  katika vituo katika mitaa yao wanayoishi,kwani bila kujiandikisha hawataweza kupiga kura kuwachagua viongozi wa serikali za mitaa.

Uchaguzi wa serikali za mitaa hapa Tanzania bara utafanyika tarehe 24/11/2019.Kwa halmashauri ya manispaa ya Temeke,uchaguzi huo utafanyika katika mitaa 142.