MSTAHIKI MEYA AHIMIZA ULIPAJI NA UKUSANYI WA MAPATO KWA MAENDELEO YA TEMEKE

Posted on: September 30th, 2023

Na: Joanita Joseph -TMC

Mstahiki Meya wa Halmashauri ya Manispaa ya Temeke Mheshimiwa Abdallah Mtinika ametoa wito kwa wananchi kutimiza wajibu wao wa kulipa kodi na ushuru stahiki ili kuwezesha Manispaa na Serikali kwa ujumla kupata mapato kwa ajili ya kupanga mikakati ya kuwaletea maendeleo.

Mheshimiwa Meya ametoa wito huo leo Septemba 27, 2023 kwenye mkutano na waandishi wa habari kuelezea mafanikio yaliyopatikana kwa mwaka wa fedha 2022/2023 ulioishia tarehe 30 Juni 2023.

Mhe. Mtinika amesema kuwa Halmashauri kwa mwaka huo wa fedha imefanikiwa kukusanya Tshs Bilioni 43.9 kutoka kwenye vyanzo vyake mbalimbali vya mapato ya ndani ikiwa sawa na asilimia 101 ya lengo la makusanyo na Tshs Bilioni 19.9 kutoka humo zimetumika kutekeleza miradi ya maendeleo.

"Kwa mwaka huu mpya wa fedha 2023/2024 kiasi kilichopangwa kukusanywa ni Tshs Bilioni 47.7, hivyo niwaombe wananchi tulipe kodi, wenye malimbikizo ya madeni walipe lakini pia tumejipanga kudhibiti mianya yote ya upotevu wa mapato ikiwemo kupokea taarifa ya vyanzo vinavyopotea ili kuzuia uvujaji wa fedha za halmashauri" alisema Mhe. Mtinika.

Vilevile ameeleza kuwa halmashauri ilipokea ruzuku kutoka serikali kuu ya Tshs Bilioni 10.4 kwa ajili ya utekelezaji wa miradi ya maendeleo ikiwemo ujenzi wa shule mpya za msingi na sekondari, ujenzi wa vyumba vya madarasa pamoja na uboreshaji katika sekta ya afya.

Halikadhalika ameeleza kuwa halmashauri ilifanikiwa kutenga asilimia kumi ya mapato yake ya ndani kwa ajili ya utoaji mikopo kwa wanawake , vijana na walemavu ambapo kiasi cha Tshs Bilioni 2.9 kimetumika kwa makundi hayo.

Amehitimisha mkutano huo kwa kusisitiza wananchi kuendelea kutunza amani iliyopo nchini na kuishukuru Serikali ya awamu ya sita chini ya uongozi wa Mhe. Rais Dkt Samia Suluhu Hassan pamoja na Menejimenti na watendaji wote wa Halmashauri ya Temeke kwa kuwezesha mafanikio hayo.