Mstahiki Meya awaondoa hofu wakazi wa Kata ya Kijichi

Posted on: December 11th, 2019

 “HATUJAGAWA KIZIMBA HATA KIMOJA SOKO LA KIJICHI WANANCHI WA KIJICHI ONDOENI HOFU” MHE.CHAUREMBO.

Mstahiki Meya wa Manispaa ya Temeke Mhe Abdalah Chaurembo amewahakikishia wananchi wa kijichi kuwa bado vizimba vya soko la Kijichi havijagawiwa kwa wanachi kinachofanyika sasa wananchi wanachukua fomu za kuomba kupatiwa vizimba.

Na mchakato wa kugawa vizimba katika soko hilo lazima maamuzi yafanyike kupitia Kamati ya Fedha na  Baraza la Madiwani ambapo Mhe Diwani wa Kata hiyo atashiriki kikamilifu kwa kuwa yeye ndiye Mwakilishi wa wananchi katika eneo hilo.

Ametoa ufafanuzi huo jana ofisini kwake Manispaa ya Temeke Makao Makuu wakati akifanya mahojiano na TMC TV kufuatia minong’ono iliyoanza kuenea kwa wananchi kuwa Manispaa ya Temeke imeshaanza kugawa vizimba katika Soko la Kijichi.

Mhe Abdalah Chaurembo amesema mnamo tarehe 21 Octoba 2019 Menejimenti ya Halmashauri ya  Manispaa Temeke katika kikao cha kamati ya fedha  ilileta agenda mbalimbali miongoni mwa agenda hizo agenda namba 7 ilikuwa ni kuwasilisha mapendekezo ya rasimu ya muongozo wa uendeshaji wa masoko na vituo vya daladala.

“Katika kujadili ajenda hizo tuliweza kuzungumza mambo mbalimbali na mojawapo ni namna gani tunaweza kugawa vizimba na maduka katika masoko yetu tuliyo yaboresha. Nikisoma katika rasimu imeelekeza kuwa katika ugawaji wa vizimba hivyo wafanya biashara watapata miezi mitatu ya matazamio katika miezi hiyo watafanya biashara bila kulipa chochote yaani “Grace Period” na hiyo itahusisha wafanyabiashara wapya tu ambao wapo awali hawakuwa na vizimba pia kipaumbele kitakuwa kwa wafanyabiashara wa zamani katika eneo husika” Alisema Mh. Chaurembo

Aidha Mhe Chaurembo alisisitiza kuwa katika masoko yote yaliyoboreshwa katika Manispaa ya Temeke ugawaji wa vizimba kipaumbele kikubwa kitakuwa ni kwa wenyenyeji wa maeneneo husika yaani wale ambao awali walikuwa wanafanya biashara katika maeneo hayo na wakapisha ujenzi huo wa soko na wale ambao ni wazawa yawezekana awali hawakuwa wakifanya biashara lakini sasa wanataka kufanya biashara na wananchi wa kata za jirani zilizopo ndani ya wilaya ya Temeke.

Ifahamike kuwa Soko la Kijichi ni miongoni mwa masoko ya kisasa ambayo yamejengwa na Mradi wa DMDP katika halmashauri ya Manispaa ya Temeke na yana sehemu nzuri za maduka pamoja na vizimba na hiyo yote ni katika utekelezaji wa Ilani ya Chama cha Mapinduzi  na kauli mbiu ya HAPA KAZI TU  kama Rais wetu mpendwa Dkt John Pombe Magufuli anavyoisimamia kuhakikisha wanachi hasa wa kipato cha chini wanakuza vipato vyao.

Katika picha ni mwonekano wa vizimba kwa ajili ya wafanyabiashara wadogowadogo katika soko la kisasa kijichi Halmashauri ya Manispaa ya Temeke