NAIBU KATIBU MKUU AFURAHISHWA NA KASI YA UJENZI WA HOSPITALI YA GHOROFA SITA MBAGALA RANGITATU

Posted on: July 2nd, 2024

Na:Shalua Mpanda-TMC

Naibu Katibu Mkuu Ofisi ya Rais Tamisemi anayeshughulika na Afya Dkt Charles Mahera amefurahishwa na kasi ya ujenzi wa jengo la ghorofa sita la hospitali ya Mbagala Rangitatu.

Akizungumza na watendaji wa Halmashauri ya manispaa hiyo katika ziara yake aliyoifanya leo Julai 2,2024 katika eneo hilo amesema hapo awali ujenzi huo ulikuwa unasuasua kuanza kutokana na baadhi ya mambo kutokukamilika lakini ameshangaa kuona ujenzi huo umefikia asilimia karibu 50.

"Leo sina mengi zaidi ya kuwapongeza kwa yale tuliyokubaliana hapa mmetekeleza kwa kasi ya ajabu".Alisema Katibu huyo.

Kwa upande wake Meya wa manispaa ya Temeke mheshimiwa Abdallah Mtinika amemshukuru Naibu Katibu mkuu huyo kwa kuwa mstari wa mbele kufuatilia ujenzi huo mara kwa mara na kumuahidi kuwa atahakikisha wanasimamia ujenzi huo uishe kwa wakati.

Mkurugenzi wa manispaa ya Temeke ndugu Elihuruma Mabelya amesema ujenzi huo ambao mpaka kukamilika kwake utatumia Shilingi bilioni 10.58 ni juhudi za Mhe.Rais Dkt. Samia Suluhu Hassan kuhakikisha anaboresha huduma za Afya kwa wananchi.

Jengo hilo litakapokamilika litasaidia kupunguza msongamano wa wagonjwa katika Hospitali hiyo ambayo kwa sasa inahudumia wagonjwa zaidi ya elfu moja kwa siku.