NAIBU MEYA AFURAHISHWA NA UJENZI SOKO LA MACHINGA DODOMA

Posted on: September 24th, 2022

Naibu meya wa manispaa ya Temeke mheshimiwa Arnold Peter ameonesha kufurahishwa kwake na ujenzi wa soko la wazi la Wamachinga jijini Dodoma.

Akiwa ameambatana na madiwani wa halmashauri ya manispaa yaTemeke pamoja na baadhi ya wataalamu wa Manispaa hiyo waliopo katika ziara ya mafunzo jijini Dodoma,naibu Meya huyo amesema miradi yote waliyotembelea ni mizuri,ila mradi wa Soko la Wamachinga umewagusa wanufaika halisi.

"Ukisema nichague mradi upi kwangu ni bora, nitasema ni huu(soko la Wamachinga) japokuwa miradi yote ni mizuri".Alisema Mhe.Arnold

Naye mkuu wa idara ya utumishi na utawala wa manispaa ya Temeke ndugu Bihaga Yogwa amesema kuwa lengo la ziara hiyo limefanikiwa kwa kuwa wamejifunza mambo mengi ambayo watakapoanza kuyatekeleza,yatawanufaisha.

Mchumi kutoka halmashauri ya jiji la Dodoma ndugu Amani Ng'oma amesema ujenzi wa soko hilo la kisasa la wazi la Wamachinga umetumia kiasi cha shilingi bilioni 9.5 zilizotokana na makusanyo ya mapato ya ndani na fedha kutoka serikali Kuu huku akibainisha kuwa ujenzi wa Soko hilo umezingatia mahitaji muhimu ya Wafanyabiashara hao.

Mhe.Fatuma Shija ambaye ni diwani wa viti maalum Temeke amesema endapo Viongozi hao wa Wananchi na Wataalamu watashirikiana wana uwezo wa kufanya mambo makubwa kama hayo kwa kuwa Temeke ni manispaa yenye uwezo wa kukusanya mapato mengi.

Katika ziara hiyo waheshimiwa Madiwani na baadhi ya wataalam mbalimbali kutoka halmashauri ya manispaa ya Temeke,walifanikiwa pia kutembelea stendi kuu ya mabasi Dodoma,soko kuu la Job Ndugai,hoteli ya Dodoma City inayojengwa na halmashauri ya jiji la Dodoma.