Naibu Waziri wa maji atembelea miradi ya Maji kata ya Tandika na Sandali Manispaa ya Temeke

Posted on: March 15th, 2019

Naibu Waziri wa Maji Mh Juma Hamidu Aweso afanya ukaguzi na kutembelea miradi ya maji iliyopo katika kata ya Tandika na Sandali ndani ya Manispaa ya Temeke.

Katika ziara hii Mh Waziri aliambatana na wajumbe wa kamati ya kudumu ya Bunge ,Kilimo na Mifugo ambapo kwa pamoja waliweza kusomewa ripoti ya miradi yote miwili na kisha kutembelea kata zilizounganishwa  kujionea uhalisia wa upatikanaji wa maji kwa wakati.

Akisoma taarifa ya mchakato mzima wa upatikanaji wa maji katika maeneo hayo Eng  wa Maji ndugu Primy Damas alibainisha mbele ya wajumbe kwamba, miradi hiyo imekuwa msaada sana kwa wakati wa maeneo hayo na hata wa kata jirani kwakuwa maji ni ya uhakika na yanapatikana muda wote na zaidi sana ni salama kwa matumizi ya majumbani.

“Maji haya yamekuwa chachu ya maendeleo kwani yamesaidia akina mama wengi kutotembea mwendo mrefu kutafuta maji kwakuwa maji yanapatikana wakati wote, na kwa kata ya Tandika jumla ya wakazi 5140 wananufaika na huduma hii ya mani safi na salama” Alibainisha

Aidha mtandao wa mabomba umeongezeka kutoka 4000 mpaka 5080 na idadi ya vituo vya kuchotea maji vimeongezeka kutoka 8 mpaka 10 na wateje 21 wa majumbani waliunganishiwa maji .

Pamoja na hilo Eng Primy alibainisha kwamba mradi wa maji wa Sandali (Mamboleo B)umekamilika na unafanya kazi , mradi huu unanufaisha wakazi 5250 katika kuwapatia huduma ya maji.

Eng Primy alifafanua zaidi kwamba, mahitaji halisi ya maji ni kiasi cha lita za ujazo 135.33 milioni kwa siku (wastani wa lita 80 kwa mtu kwa siku) wakati kiasi halisi kinachopatikana ni lita za ujazo 90.7 milioni kwa siku sawa na asilimia 67 tu ya mahitaji ya wakazi wa Manispaa ya Temeke kwa matumizi ya aina zote ,majumbani ,viwandani na shughuli nyingine za kiuchumi na kijamii.

Pamoja na hayo vyanzo vya maji yanayopatikana kwa siku yanatokana na visima virefu vya maji ,mtandao wa mabomba ya DAWASA  kutoka Ruvu Juu/Chini na mengine kutoka chanzo cha mto Kizinga –Mtoni alifafanua Eng wa Maji.

Hivyo basi Halmashauri ya Manispaa ya Temeke kwa kushirikiana na wadau mbalimbali ikiwa pamoja na DAWASA na mashirika mengine yasiyo ya kiserikali inaendelea kushirikiana katika kuhakikisha kwamba wakazi wa Manispaa ba Wilaya kwa ujumla wanapata huduma ya maji safi na salama karibu na makazi yao