"NITAKUWA BALOZI MZURI WA TEMEKE KWAKUWA IMEFANYA MAMBO MAZURI SANA" NAIBU KATIBU MKUU TAMISEMI

Posted on: January 4th, 2023

Na; Sweetbetter Njige

TMC Habari

Leo Januari 04,2023 naibu katibu mkuu TAMISEMI ndugu Ramadhani Kailima amefanya ziara ya kukagua ujenzi wa vyumba vya madarasa katika  shule za Sekondari, ambapo alitembelea pia ujenzi wa madarasa ya ghorofa katika shule ya sekondari Dovya na Lumo.

Akizungumza katika ziara hiyo Ndg. Kailima alisema amefurahishwa na utendaji kazi uliopo kwa watumishi na watendaji wa Temeke, alisema

"Niwapongeze Temeke mnafanya kazi nzuri sana, Mkurugenzi na watendaji wako kazi inaonekana, umenileta hapa Dovya kuna ujenzi wa ghorofa ya floor nne (04) yenye madarasa 32, lakini nilipita mwezi Novemba nikakuta madarasa 12 yanajengwa Mkurugenzi uliniahidi nikirudi yatakuwa yamekamilika nimekuta hivyo mimi nitakuwa balozi mzuri wa Temeke kwakuwa mnafanya mambo mazuri sana"

Aidha Ndg. Kailima amepongeza utaratibu ulioanzishwa na manispaa ya Temeke wa kuwafanyia "orientation" wanafunzi wa kidato cha kwanza waliochaguliwa kuanza masomo ya sekondari katika shule za sekondari za Kata husika,alieleza.

"Niwapongeze Mkurugenzi,Madiwani na wakuu wa shule kwa utaratibu huu, mmefungua shule kwa kidato cha kwanza tu tangu Januari 02 na tayari 90% ya Wanafunzi wameripoti,hii sio tu inatusaidia kwenye takwimu lakini pia tunatengeneza mazingira watoto kuzoea mapema ikifika Januari 09, wanaanza kusoma moja kwa moja, nashauri Halmashauri nyingine ziige mfano huu, kwa shule za kutwa watoto wawe wanafanyiwa hivi".

Kwa upande wake Mkurugenzi wa manispaa ya Temeke amemshukuru Naibu Katibu Mkuu kwa kutembelea miradi hiyo na kuahidi kuendelea kupokea maagizo na kuyafanyia kazi.

Manispaa ya Temeke inatekeleza mradi wa ujenzi wa vyumba 207 vya madarasa katika shule mbalimbali za Sekondari,kadhalika kutokana na changamoto ya uhaba wa maeneo,Manispaa imeamua kujenga madarasa ya gorofa ,ambapo utekelezaji wake umeanza katika shule ya Dovya na Lumo.