NJOMBE MJI NA ILALA WAPATIWA DARASA TEMEKE LA UENDESHAJI MASOKO MAPYA YA KISASA.

Posted on: November 27th, 2020

Halmashauri ya Mji Njombe pamoja na Manispaa ya Ilala wamefanya ziara ya mafunzo ya kimkakati katika Manispaa ya Temeke kujifunza namna bora ya uendeshaji wa masoko mapya ya kisasa.

Wataam hao wamezuru Manispaa ya Temeke Jijini Dar es Salaam mapema leo na kupokelewa na Mkurugenzi wa Manispaa Ndg Lusubilo Mwakabibi akiwa na timu ya wakuu wa Idara na vitengo wa Manispaa, kisha kupata wasaa wa kubadilishana uzoefu wa namna taasisi hizo zinavyoweza kufanya vizuri katika nyanja za masoko kwa lengo la kuleta ustawi wa jamii za kitanzania.

Akiongea wakati wa ziara ya kutembelea baadhi ya masoko mapya ya kisasa yaliyojengwa na Manispaa ya Temeke kupitia mradi wa DMDP ‘Dar es Salaam Metropolitan Development Project’ Katibu tawala wa Mji wa Njombe Ndg. Emmanuel George amesema Njombe Mji wanatekeleza mradi mkubwa wa Soko la kisasa katikati ya Mji, kwa sasa Soko hilo limekamilika kilichobaki ni wafanyabiashara kuanza kulitumia  Soko hilo.

Kwa kuwa Temeke inauzoefu katika uendeshaji wa masoko mapya wakaona ipo sababu ya kufanya ziara ya kimkakati kujifunza namna Temeke ilivyofanikiwa na changamoto inazopitia katika uendeshaji wa masoko kwa ujumla wake.

Vilevile kuweza kuzitangaza fursa zinazopatikana katika Mji wa Njombe kwa mfano kilimo cha Parachichi ambacho sasa kina Soko kubwa ndani na  nje ya nchi pamoja nakuona uwezekano wa wafanyabiashara wa Njombe na Temeke kufanya biashara kwa pamoja kama kuleta viazi katika masoko ya Temeke na bidhaa zingine zinazofanana na hizo.

Kwa upande wa mratibu wa mradi wa DMDP Temeke Ndg Edward S.Haule amesema kinachofanyika Temeke ni utekelezaji wa maagizo ya Serikali kupitia Ilani ya CCM yenye lengo la kuwainua wananchi au kuleta ustawi katika Maisha ya kila siku, wageni kutoka Njombe na Ilala wamekuja kujifunza na kubadilishana uzoefu wa namna bora ya kuendesha masoko mapya.

Kupitia masoko 2 waliyotembelea Kijichi na Makangarawe wameweza kujifunza muundo wa usimamizi wa masoko, usafi na utunzaji wa miundombinu ya soko, namna masoko yanavyoweza kuwa vyanzo vya mapato pia Temeke inavyoweza kufanya kazi kwa timu kwa kuwa suala la masoko ni mtambuka linahitaji ushikiano wa Idara na vitengo vyote.

“Aidha ujio wa wageni wanaokuja kujifunza au kupata uzoefu Temeke wanatupa morali ya kuongeza juhudi ili kuweza kufanya vizuri zaidi ya hapa tulipo” alisema Ndg Edward.

Mwisho Mkurugenzi wa Manispaa amefafanua kuwa Manispaa ya Temeke imekuwa ikipokea wageni kutoka mikoa na Halmashauri mbalimbali Nchini wakija kujifunza utekelezaji wa miradi ya maendeleo, hiyo ni faraja kwetu lakini pia inatuongezea nguvu ya kukimbia zaidi kwa kuwa wabunifu katika kuibua miradi na utekelezaji wake ili kuleta ustawi wa wananchi.