NMB YATOA MABATI KWA SHULE ZA MSINGI TEMEKE

Posted on: June 14th, 2021

Benki ya NMB imetoa jumla ya mabati 576 kwa shule za msingi Yombo Dovya,Faraja na Toangoma zilizopo manispaa ya Temeke katika kuhakikisha wanaboresha miundo mbinu ya elimu wilayani humo.

Akizungumza katika makabidhiano hayo yaliyofanyika shuleni hapo,meneja wa NMB kanda ya Dar es salaam Donatus Richard amesema kuwa huo ni utaratibu wa benki hiyo kurudisha faida kwa wananchi.

"NMB tunajivunia kuwa benki inayoongoza kuwa na matawi zaidi ya 200 nchi nzima na tunajivunia kuwa karibu na jamii kwa kutoa misaada kama hii".Alisema Meneja huyo

Kwa upande wake Mkuu wa wilaya Temeke Mh.Godwin Gondwe ambaye ndiye alikuwa mgeni rasmi katika hafla hiyo amebainisha kuwa wilaya hiyo inakabiliwa na uhaba mkubwa wa madawati,vyumba vya madarasa na matundu ya vyoo kutokana wingi wa wanafunzi na ameishukuru benki hiyo kwa kuliona hilo.

"Kuna baadhi ya shule unakuta ina wanafunzi wanafika elfu 8 na hii inapelekea kuwa na changamoto.Na hili NMB wameliona na leo wanatupa bati 576".Ameongeza Mh.Gondwe

Awali akisoma taarifa ya shule hiyo Mwalimu mkuu wa shule hiyo alimueleza Mkuu wa wilaya kuwa shule hiyo kongwe inakabiliwa na changamoto mbalimbali na kumuomba Mkuu huyo msaada huo usiwe mwisho.

Benki hiyo pia imeahidi kuendelea kusaidia kuinua sekta ya elimu wilayani Temeke na Tanzania kwa ujumla kwa kutoa misaada ili kurudisha kile wanachokipata kwa jamii.