"RAMANI ZOTE ZA UJENZI WA VYOO VIPYA VYA WANAFUNZI TEMEKE VIZINGATIE MAHITAJI YA WATOTO WA KIKE NA WENYE ULEMAVU" DC GODWIN GONDWE.

Posted on: November 30th, 2020

Mkuu wa wilaya ya Temeke Mhe Godwin Gondwe ametoa maelekezo kwa Mkurugenzi wa Manispaa, kuanzia leo ramani zote zinazoandaliwa kwa ajili ya ujenzi wa matundu ya vyoo hususani  vya wanafunzi wa shule kuzingatia mahitaji muhimu ya watoto wa kike na wenye ulemavu.

Ameyasema hayo leo katika muendelezo wa ziara zake za kila siku za kutembelea na kujionea maendeleo ya miradi mbalimbali inayotekelezwa katika wilaya ya Temeke Jijini Dar es Salaam.

Katika ziara yake ameambatana na kamati ya Ulinzi na usalama, kaimu katibu tawala wa wilaya Bi Bertha Minga, muwakilishi wa Mkurugenzi ambaye pia ni Mkuu wa kitengo cha manunuzi Ndg Sosthenes  Chacha pamoja na wataalam wengine kutoka ofisi ya Mkurugezi ambao ni wakuu wa Idara na vitengo.

Ziara yake imelenga kukagua miundombinu ya Shule ikiwemo bweni la wanafunzi, matundu ya vyoo, madarasa, na maabara katika shule ya sekondari Mikwambe. 

Aidha ujenzi wa jengo la gorofa la madarasa ya kidato cha V na VI Mbagala , vilevile ujenzi wa vyumba vipya vya madarasa 12 katika shule ya sekondari Mbagala kuu.

Akiongea wakati wa majumuhisho Mhe Mkuu wa wilaya amesema miradi hiyo iko vizuri na pongezi kubwa kwa Mkurugenzi wa Manispaa Ndg Lusubilo Mwakabibi na wataalam wake, lakini yako mambo ameyabaini yanayotakiwa kufanyiwa kazi ambayo ni: Ujenzi wa vyoo uwe na sehemu maalum ambayo watoto wakike watajisitiri wakati wa hedhi. 

Kwa upande wa vyoo vitakavyojengwa katika shule kwa ajili ya matumizi ya wanafunzi kuanzia sasa lazima vikidhi mahitaji ya wanafunzi wenye ulemavu.

Sambamba na hilo amesistiza miradi yote katika wilaya ya Temeke izingatie thamani ya pesa "value for money" bila kusahau miradi ikamilike kwa wakati kwa mujibu wa mkataba na iwe ya viwango vya juu na rangi zipakwe vizuri zivutie. 

Vilevile mifumo mizuri ya uvunaji maji ya mvua, kama eneo ardhi yake maji yanapatikana vichimbwe visima ili kuhakikisha wakati wote wanafunzi wanapata maji safi na salama.

Aidha majengo ya shule za Sekondari yajengwe kwa kizingatia tahadhari za hali ya juu za majanga ya moto kwa kuhakikisha hakuna nyaya za umeme zilizo wazi katika mabweni na vyumba vya madarasa, pia kuwepo kwa vidhibiti moto na wanafunzi wapewe mafunzo ya matumizi ya vifaa hivyo vya kudhibiti majanga ya moto.

Kwa upande wa mwakilishi wa Mkurugenzi Ndg Sosthenes Chacha amemshukuru Mhe Rais wa Jamuhuri ya Muungano wa Tanzania Dkt John Pombe Magufuli kwa kuleta fedha za kutekeleza miradi ya maendeleo Temeke hususani ujenzi wa vyumba vipya vya madarasa 54, pia amemshukuru Mhe Mkuu wa wilaya kwa kuwa karibu katika kufuatilia na kutoa ushauri wa namna bora ya kutekeleza miradi hiyo ya maendeleo.