RAS DAR avutiwa na ubunifu wa wajasiriamali wa Temeke

Posted on: August 5th, 2018

Katibu Tawala wa Mkoa wa Dar es salaam ndug: Abubakar Kunenge afurahishwa na wajasiriamali toka Manispaa ya Temeke kwa kuonesha vitu mbalimbali vyenye ubora na vifungashio vya kisasa katika bidhaa zao na jinsi zinavyoongeza thamani katika biashara.

Aliyasema hayo alipotembelea banda la Manispaa ya Temeke na kujionea bidhaa mbalimbali zitokanazo na mimea, mifugo na viwandani kutoka kwa wajasiriamali wadogo wadogo walioleta bidhaa zao katika maonesho ya 25 ya nanenane.

“Nimefurahishwa kwa jinsi mlivyozipa thamani bidhaa zenu katika namna ya ubora wake na zaidi sana mnavifungasho vya kisasa ambavyo vinamfanya mteja kuvutiwa kwa namna mlivyohifadhi vyakula kwa ubora unaostahili”Alisema

Pia amewataka wajasiriamali hao hususani wakulima kuyaishi mabadiliko ya tabia nchi ili kuendana na hali halisi ya mazingira, vile vile ameshauri wakulima kupata mafunzo mara kwa mara kutoka kwa wataalam  ili kuwekeza katika kilimo, mifugo na uvuvi kwa maendeleo ya viwanda.

Katibu Tawala Mkoa amewataka wataalam kutumia taaluma zao katika kuwafundisha wakulima mbinu mpya kila wakati ambayo itakuwa chachu katika ujasiriamali wao hivyo kuwawezesha kujikwamua katika maisha na kupata matokeo mazuri katika bidhaa zao .

‘’Nimefurahishwa sana na wajasiriamali toka TASAF kwa fedha zao kidogo wanazopokea kwa kuweza kujibana hatimae kujifunza ujasiriamali na kuweza kuonyesha bidhaa zao katika maonesho haya’’.Alisema Kunenge.

Manispaa ya Temeke kupitia wataalamu wake imeweza kuwasimamia wakulima na wajasiriamali wadogo ili kuwekeza katika kilimo, mifugo na uvuvi kwa maendeleo ya viwanda.