RC CHALAMILA AFUNGUA MAFUNZO ELEKEZI KWA MAAFISA TARAFA NA WATENDAJI WA KATA DAR

Posted on: November 23rd, 2023

Na Shamsi Dady - TMC Habari.

Mkuu wa mkoa wa Dar-es-salaam Mhe.Albert Chalamila amefungua rasmi mafunzo elekezi kwa maafisa tarafa na watendaji wa kata zote mkoani Dar-es-salaam.

Akizungumza wakati akifungua mafunzo hayo leo Novemba 23,2023 katika ukumbi mkubwa wa mikutano wa halmashauri ya Manispaa ya Temeke (Iddi Nyundo), huku akisisitiza Maafisa hao kuwa waadilifu na misingi imara ya utekelezaji wa majukumu,amesema lengo kuu la mafunzo hayo ni kudumisha utekelezaji kwa ufanisi,kwa kuzingatia uongozi na utawala bora.

Kadhalika Mhe. Chalamila amewakumbusha Watumishi hao kuwa na usawa wanapoanza mafunzo hayo, bila kujali utofauti wa ngazi za elimu walionao.

"Elimu uliyonayo sio suala, na ndio maana hamjaja hapa kuchukua mafunzo ya shahada au stashahada ,kwa maana ni mafunzo ya muda mfupi ambayo yanatukumbusha wajibu wetu."Alisema Mkuu wa Mkoa.

Naye mkuu wa wilaya ya Temeke Mhe Sixtus Mapunda, alipata nafasi ya kumkaribisha mgeni rasmi na wageni waalikwa na kupongeza mafunzo hayo kufanyika ndani ya wilaya yake.

"Nawashukuru sana kwa heshima mliotupatia ,kwa kutuletea shughuli mzima Temeke,kupata fursa ya hawa Viongozi Kufanya mafunzo yao Temeke kwa sababu mbalimbali." Alisema Mhe. Mapunda.

Mafunzo hayo ambayo viongozi mbalimbali wameshiriki ufunguzi wake, akiwemo mkurugenzi msaidizi OR - TAMISEMI ndugu Ibrahim Pius Minja, katibu tawala msaidizi Ofisi ya Mkuu wa Mkoa wa Dar-es-salaam,ndugu Sudi Mpili, naibu mkuu wa chuo cha Mipango,Fedha na Utawala ndugu Lazaro Kisumbe,pamoja na wadau mbalimbali yanatarajiwa kuleta mabadiliko makubwa ya kiutendaji kwa Maafisa hao ambao ndio wawakilishi wa Wakurugenzi na Wakuu wa wilaya katika maeneo yao.