RC CHALAMILA AHIMIZA MATUMIZI SAHIHI YA SERVICE ROAD

Posted on: January 20th, 2025

Kuelekea Mapokezi ya ugeni wa Viongozi wa Mataifa mbalimbali Barani Afrika watakaohudhuria Mkutano wa Matumizi ya Nishati safi Nchini kuanzia tarehe 27 Januari, Mkuu wa Mkoa wa Dar es salaam Mheshimiwa Albert Chalamila amefanya Ziara ya ukaguzi wa miradi ya maendeleo hususani ujenzi wa barabara za mabasi yaendayo haraka (mwendokasi), ukarabati wa ukumbi wa Karimjee, ukumbi wa mikutano wa kimataifa JINCC na miradi mingineyo.

Akizungumza na Waandishi wa habari mhe. Chalamila amesema kama Mkoa tunapaswa kujiandaa na mapokezi ya ugeni kwa kuzingatia masuala mbalimbali ikiwemo matumizi sahihi ya barabara lengo ni kuacha mji wetu ukiwa unaonekana na upo katika utaratibu mzuri.

"Tumekubaliana "road reserves" sio parking za malori, tumeshakubaliana na wenzetu vyombo vya dola, kwa mtu yeyote atakayekaidi kuondoa malori hayo itakua ni sawa na ku 'sabotage' mkutano huu kufanyika Nchini. Malori ni uwekezaji lakini unahitajika utaratibu mzuri wa kuegesha"

Aidha Mhe. Chalamila ametoa hamasa kwa Watanzania kutumia fursa ya kufanyika kwa mkutano huo ili kujikwamua kiuchumi.

"Mkutano wowote ule wa Kimataifa, lazima uwe na 'impact' ya kiuchumi kwa Watu wanaoishi katika eneo husika. Tumekubaliana kufunga baadhi ya barabara zinazozunguka eneo la ukumbi wa mkutano ili Wafanyabiashara wetu waweze kuonesha biashara ambazo zitakua zinatambulisha Utamaduni, Uzalishaji, Uwezo wa kusafirisha nje ya mipaka na fahari ya Mtanzania. Ofisi ya mkuu wa mkoa imeratibu zoezi hilo lakini nitoe rai kwa wanaotaka kuja kujiunga waje ofisi ya mkuu wa Mkoa ili wapate utaratibu".

RC Chalamila amewakumbusha Watanzania wote kuwa mkutano huu utafanyika Nchini kutokana na juhudi za mhe. Rais Dkt. Samia Suluhu Hassan kusimamia Diplomasia Kimataifa pamoja na uwepo wa amani na mshikamano baina ya Serikali na Wananchi.