RC CHALAMILA AKAMILISHA ZIARA TEMEKE, AKAGUA MIRADI LUKUKI

Posted on: February 20th, 2024

Na:Shalua Mpanda-TMC Habari

Mkuu wa mkoa wa Dar es salaam Mhe. Albert Chalamila februari 20, 2024 amehitimisha ziara ya kikazi ya siku mbili wilayani Temeke huku miradi yenye thamani ya zaidi Bilioni 40 ikikaguliwa pamoja na utatuzi wa kero za wananchi.

Mhe.Chalamila amekagua na kuweka jiwe la msingi katika mradi wa ujenzi wa shule mpya ya sekondari ya Mangaya yenye ghorofa tatu(3) iliyopo kata ya Mbagala unaotarajiwa kugharimu Milioni 850 mpaka kukamilika kwake

Vilevile ametembelea mradi wa ujenzi wa ghorofa 6 hospitali ya Mbagala Rangitatu pamoja na mradi wa upanuzi wa kituo cha kupoza umeme Mbagala utakaogharimu Bilioni 16 huku akikamilisha ziara kwa siku hiyo ya kwanza kwa kukagua mradi wa ujenzi wa barabara ya Chamazi Sekondari wenye thamani ya Shilingi milioni 104.

Katika siku ya pili ya ziara yake RC Chalamila Mkuu amekagua mradi wa uwekaji waya ardhini unaolenga kusafirisha umeme ardhini wenye thamani ya Bilioni 15, ameongea na wanafunzi katika shule ya sekondari Chang'ombe pamoja na kukagua mradi wa ujenzi wa vyumba 7 vya ghorofa wenye thamani ya Shilingi milioni 400.

Halikadhalika amekagua mradi wa ujenzi wa barabara ya Kitomondo(0.35 Km) kata ya Miburani yenye thamani ya Shilingi milioni 175 pamoja na kuzindua shule mpya ya msingi Ushirika iliyopo kata ya Yombo vituka wilayani humu uliyogharimu milioni 475 mpaka kukamilika kwake.

RC Chalamila ameonesha kuridhishwa na kasi ya utekelezaji wa miradi ya maendeleo, amepongeza uongozi wa manispaa ya Temeke kwa usimamizi mzuri wa halmashauri na mwisho alipata wasaa wa kuzungumza na wananchi pamoja kutatua kero na changamoto zao katika mikutano ya hadhara iliyofanyika katika majimbo ya Mbagala na Temeke.