RC MAKALLA: ACHENI KUPANGA BIASHARA BARABARANI

Posted on: January 28th, 2023

Na:Shalua Mpanda-TMC

Mkuu wa mkoa wa Dar es salaam mheshimiwa Amos Makalla amewataka wafanyabiashara wanaofanya biashara maeneo yasiyoruhusiwa hasa ya barabara kuondoka maeneo hayo ili kuweza kutunza miundombinu hiyo.

Mhe.Makalla amesema hayo leo Januari 28,2023 wakati wa kampeni maalum ya usafi ya kila mwisho wa mwezi ambayo Kimkoa imefanyika katika kata ya Charambe, mtaa wa Rangitatu.

"Barabara za mabasi ya mwendokasi ni maalum kwa mabasi hayo na si kwa ajili ya kupanga biashara,waulizeni wenzenu wa Msimbazi walikuwa wanapanga biashara kwenye barabara hizo,kila siku walikuwa wanagongwa na mabasi hayo".Alisema Mkuu huyo wa Mkoa.

Aidha Mhe. Makalla amewataka Wafanyabiashara hao kuacha kufanya biashara katika barabarani hiyo ili kumuwezesha Mkandarasi kufanya kazi zake kwa uhuru.

Awali akiongea na Wananchi waliojitokeza kufanya usafi katika eneo hilo Mkuu huyo wa Mkoa aliwataka Wananchi hao kujenga tabia ya kufanya usafi kwenye maeneo yao na sio kusubiri mwisho wa mwezi, huku akisisitiza pia upandaji wa miti na utengenezaji wa bustani kwenye makazi yao ili kuifanya Dar es Salaam kuwa ya kijani.

Akimshukuru Mkuu wa mkoa,Mstahiki meya wa manispaa ya Temeke Mhe. Abdallah Mtinika amesema mkuu wa mkoa wa Dar es salaam amekuwa ni kiongozi anayeonesha kwa vitendo kuwa ni mtu anayependa usafi ambapo katika kudhihirisha hilo aliandaa ziara ya viongozi wa mkoa wa Dar es salaam kwenda nchini Rwanda kujifunza namna ya utunzaji wa mazingira.

Kampeni ya usafi wa kila mwisho wa mwezi ambayo ilianzishwa na Mkuu huyo wa mkoa,imekuwa na mafanikio makubwa ambapo imesaidia kupunguza magonjwa ya mlipuko hasa kipindupindu kilichokuwa kinasumbua katika Mkoa huu.