SAA 48 TU ZATOSHA KUTIMIZA AGIZO LA DC JOKATE

Posted on: September 4th, 2021

Kufuatia ziara aliyoifanya Mkuu wa wilaya ya Temeke Mheshimiwa Jokate Mwegelo siku ya Ijumaa tarehe 03/09/2021 na kuagiza kuwekwa kwa matuta ya barabarani eneo la Mzinga -Kongowe katika Manispaa ya Temeke mara baada ya mwanafunzi mmoja kugongwa na gari,agizo hilo limetekelezwa  ndani ya siku mbili(saa 48).

Akiwa katika eneo hilo leo Jumatatu alipokwenda kukagua utekelezaji huo,Mhe.Jokate aliwataka madereva kuzingatia sheria na alama za barabarani huku akiwataka wanafunzi na watumiaji wengine kuwa makini wanapovuka barabara.

"Sisi tutafanya jitihada kama Serikali kuhakikisha usalama wenu unakuwepo lakini pia jitihada za mtu mmoja mmoja ni muhimu sana".Mhe Jokate alisema

Naye kamanda wa Polisi wa wilaya ya kipolisi Mbagala Joseph Mwakabonga alisema kuwa jeshi la Polisi litahakikisha linawashughulikia madereva wote ambao hawatafuata sheria za barabarani ili kuweza kupunguza ajali katika maeneo hayo na mengine ndani ya Wilaya hiyo.

''Nitahakikisha vijana wangu wanakuwepo barabarani kusimamia agizo la Mkuu wa Wilaya lakni uwepo wao pia uambatane na kutii sheria za barabarani kwa madereva".Alisisitiza Kamanda huyo.

Mwalimu Sabia Mwantobe wa Shule ya Msingi Mzinga alimueleza mwandishi wa TMC Tv kuwa takribani wanafunzi 8 wameshagongwa na magari katika eneo hilo na kuwepo kwa matuta kutasaidia kupunguza kwa kiasi kikubwa ajali huku akimshukuru Mkuu wa wilaya huyo kwa kulipa uzito jambo hilo.

"Imekuwa faraja kwetu na kwa jamii pia,tunashukuru ujio wa Mkuu wa wilaya kumefanya uwekaji wa matuta kwa haraka sana....huyu mtoto wa juzi aligongwa nimeshuhudia,ilikuwa mbaya sana".Alidai Mwl.Mwantobe

Kaimu Meneja wa TANROADS mkoa wa Dar es salaam Elson Mwelasi aliwashauri maderava kutii alama na sheria za barabarani ili kupunguza ajali ambazo zinaweza kuepukwa endapo sheria zikifuatwa.

Hivi karibuni wanafunzi wa shule hizo walilazimika kufunga barabara kwa muda katika eneo hilo wakishinikiza kuwekwa kwa matuta mara baada ya mwanafunzi mwenzao kugongwa na gari hali iliyosababisha jeshi la polisi kuingilia kati kuwatawanya na kupelekea Mkuu wa Wilaya ya Temeke Mhe.Jokate kufika eneo hilo na kutoa maagizo kadhaa kwa Wakala wa barabara nchini(TANROADS) ikiwemo kuwekwa kwa alama za barabarani.