"SERIKALI INAENDESHWA KUPITIA RASILIMALI ZETU WENYEWE2 MD SATURA

Posted on: October 3rd, 2024

Na: Sweetbetter Njige

       TMC Habari.

Leo Oktoba 2, 2024 Mkurugenzi wa Manispaa ya Temeke Ndg. Jomaary Satura kwa niaba ya Mkuu wa Wilaya ya Temeke Mheshimiwa Sixtus Mapunda amezungumza na madereva wa bodaboda na bajaji (maafisa usafirishaji) wanaounda Shirikisho la vyama vya madereva  bodaboda na bajaji mkoa wa Dar es Salaam (SHIVYAMAPIDA).

Akizungumza katika mkutano huo mkurugenzi Satura ametoa wito kwa maafisa usafirishaji kuhakikisha wanafanya shughuli zao kwa mujibu wa taratibu za manispaa ikiwemo kulipa ushuru wa maegesho ili kuwezesha utekelezaji wa shughuli za Serikali kwa maendeleo ya manispaa ya Temeke.

"Tukumbuke kipindi tupo mihangaikoni, Serikali pia ipo mihangaikoni kuhakikisha watoto wetu wanapata madarasa ya kusoma, elimu inatolewa bure kuanzia awali hadi kidato cha sita, lakini miundombinu inatekelezwa kwa kodi zetu. Serikali inatusaidia kutoa elimu bure na matibabu bure kwa watoto chini ya miaka mitano ambao naamini baada ya muda watakuja kutusaidia kutekeleza majukumu ambayo hatutayaweza tena kutokana na umri.Tunawaomba mtupe ushirikiano, Serikali inaendeshwa kupitia tozo na rasimilai zetu wenyewe"

Aidha mkurugenzi Satura amewasihi maafisa usafirishaji kuwa mstari wa mbele katika kushiriki uchaguzi wa Serikali za mitaa utakaofanyika Novemba 27, 2024.

"Tunaendelea kusisitizwa kushiriki uchaguzi wa kidemokrasia utakaofanyika Novemba 27, 2024. Temeke tutakua na zoezi la uandikishaji kuanzia tarehe 11-20 mwezi Oktoba. Uandikishaji huu ni tofauti na ule wa uchaguzi mkuu utakaofanyika mwakani, hatuzungumzii kile kitambulisho cha mpiga kura, huu ni uchaguzi wa mamlaka za Serikali za mitaa, tunachagua menyeviti na wajumbe, tunachagua sisi wakazi wa mtaa husika, kajiandikishe pale unapoishi ili upate haki ya kumchagua kiongozi wa mtaa wako ambaye atabaki kuangalia eneo lako lisiuzwe kiholela wakati umeenda mihangaikoni. Nawasihi tupeane taarifa na wote tushiriki zoezi hili muhimu".

Mkutano huo umehudhuriwa na viongozi mbalimbali ikiwemo katibu wa Chama cha Mapinduzi Wilaya ya Temeke Ndg. Daniel Sayi.