SHEHENA YA MIFUKO YA PLASTIKI YAKAMATWA

Posted on: August 31st, 2022

Ushirikiano wa wakuu wa wilaya za Temeke na Ilala umefanikisha kukamatwa kwa mifuko ya plastiki iliyopigwa marufuku.

Mifuko hiyo yenye uzito wa kilogramu 2,117 imekamatwa katika kiwanda cha Industrial Packaging Limited(IPL) kilichopo Tabata Matumbi mkoani Dar es salaam.

Akiongea akiwa katika kiwanda hicho leo Agosti 31,2022 mkuu wa wilaya ya Ilala mheshimiwa Ng'wilabuzu Ludigija amesema ushirikiano kati ya wakuu hao wa Wilaya umefanikisha kukamata mifuko hiyo kutokana na taarifa walizopokea.

"Mifuko hii itateketezwa na kiwanda hiki kupigwa faini,ila niwaambie tu lengo la Serikali sio kurudisha nyuma maendeleo ya viwanda ila viwanda vinatakiwa vifuate sheria na taratibu za nchi".Alisema

Kwa upande wake mkuu wa wilaya ya Temeke Mhe.Jokate Mwegelo amewataka wazalishaji wa mifuko na vifungashio hivyo kuacha mara moja kwa kuwa Serikali imeshatoa zuio la utengenezaji wa mifuko ya plastiki.

"Sisi wakuu wa wilaya hapa Dar es salaam hatuna mipaka,tutawafikia popote pale kwa wale watakaoendelea kuzalisha mifuko hii".Alisema Mhe.Jokate.

Naye Meneja utekelezaji sheria kutoka NEMC ndugu Jamali Baruti ametoa wito kwa wazalishaji na watumiaji wa bidhaa hiyo kuacha mara moja ili kuweza kutunza mazingira.

Wiki iliyopita Mkuu wa mkoa wa Dar es salaam Mhe.Amos Makalla alitoa agizo kuhusu mifuko hiyo ambapo alisema Jumatatu ya wiki hii ndio mwisho wa matumizi ya mifuko hiyo na kutoa rai kwa wazalishaji wa bidhaa hizo kusalimisha kwenye mamlaka husika.