"SIASA SAFI NI MSINGI WA MAENDELEO JUMUISHI" DC JOKATE

Posted on: July 14th, 2022

Baada ya Mhe. Rais Samia Suluhu Hassan kufungua milango na  kukutana na viongozi wa vyama vya siasa nchini, Mkuu wa wilaya ya Temeke Jokate Mwegelo amefuata nyayo kwa kukutana na viongozi wa ACT Wazalendo ofisini kwake leo Julai 14,2022.

Katika mazungumzo yake na Katibu mkuu taifa wa ACT Wazalendo Bw. Ado Shaibu, Mhe. Jokate amesema kuwa siasa sio uadui na siasa Safi ni msingi wa Maendeleo jumuishi pia amefurahishwa na viongozi hao kufika ofisini kwake kujadili masuala mbalimbali  ya maendeleo.

"Niwapongeze kwa kufuatilia shughuli mbalimbali za kimaendeleo zinazofanywa ndani ya wilaya yetu na hii inadhihirisha kuwa siasa sio uadui bali sote lengo letu ni moja tu, kuwahudumia wananchi na kuleta Maendeleo jumuishi bila kumuacha mtu nyuma. Alisema Jokate

Awali Katibu huyo wa ACT alimpongeza mkuu wa wilaya ya temeke kwa kazi nzuri zinazofanywa ndani ya Manispaa hiyo ikiwemo miundombinu ya barabara akitolea mfano barabara katika kata ya Kijichi iliyojengwa kwa mradi wa uboreshaji wa jiji la Dar es salaam(DMDP).

"Kiukweli panapostahili pongezi lazima tupongeze, siasa si kupinga kila kitu na Chama chetu tunaamini sana katika fact (ukweli) ndio maana tumeamua kuja hapa kukupongeza kwa Kazi nzuri unazozifanya kwa ufupi tumeridhika sana na melezo yako mheshimiwa mkuu wa wilaya".Alisema Katibu huyo

Pamoja na mambo mengine Katibu mkuu huyo alishauri ujenzi na ukarabati wa barabara nyingine zilizopo pembezoni upewe kipaumbele ili kuweza kurahisisha usafiri kwa wananchi huku akisisitiza ukamilishwaji wa ujenzi wa barabara ya Nzasa-Kilungule.

Mkuu wa wilaya ya Temeke amekuwa mstari wa mbele kuhakikisha anakutana na watu wa kada mbalimbali toka alipoingia madarakani mwaka 2021 lengo likiwa ni kudumisha umoja na ushirikiano ili kuleta maendeleo jumuishi katika Wilaya hiyo.