TANESCO WAAGIZWA KUKAGUA TRANSFOMA ZOTE TEMEKE NDANI YA MWEZI MMOJA

Posted on: January 27th, 2024

Na:Salma Ngorwe-Mwanafunzi mafunzoni-TMC

Naibu Waziri wa Nishati mhe shimiwa Judith Kapinga Januari 26, 2024 amefanya ziara ya kukagua miundombinu ya umeme wilayani Temeke.

Katika ziara hiyo iliyofanyika katika kata ya Mbagala Kuu ambayo aliongozana na mkuu wa wilaya ya Temeke Mhe.Sixtus Mapunda,Mhe.Kapinga aliagiza Shirika la umeme Tanzania (TANESCO)kukagua transfoma zote ndani ya mwezi mmoja na kuhakikisha vifaa vyote vinakuwepo kwa ajili ya kulinda miundombinu hiyo.

Mhe.Kapinga amewataka watumishi wa Shirika hilo kufanya kazi kwa uaminifu na uadilifu na kuepuka vitendo vinavyoweza kulichafua Shirika hilo.

"Mnajua sisi tumezaliwa na hofu ya Mungu pamoja na utaalamu wetu ambao tunautegemea na kuutumia kwenye kazi, nategemea tutakua na hofu ya Mungu kwa kufanya kazi kwa uaminifu mkubwa sana kwa ajili ya kulinda rasilimali na fedha ambayo Serikali imewekeza".Alisema Naibu Waziri huyo.

Naye Mkurugenzi wa Tanesco kanda ya Mashariki Mhandisi Kenneth Boymanda amekiri kuwepo kwa mapungufu kwenye transfoma zilizokaguliwa na ameahidi kwenda kujipanga ili kufanyia kazi maelekezo ya mheshimiwa Naibu Waziri.

"Sisi kama Shirika kanda ya Mashariki tutakwenda kujipanga vizuri na wenzetu tuhakikishe maelekezo ambayo ameyatoa Mhe Naibu Waziri tunayafanyia kazi ipasavyo".Alisema Mhandisi Boymanda.

Kumekuwa na changamoto kubwa katika miundombinu ya umeme hali inayosababisha kulipuka kwa transfoma hizo mara kwa mara katika maeneo mengi ndani ya Wilaya hii.