TARURA TEMEKE YAREJESHA MAWASILIANO YALIYOKATIKA BARABARA YA GOROKA TOANGOMA

Posted on: January 28th, 2024

Na: Joanita Joseph - TMC Habari

Wakala wa barabara za vijijini na Mijini (TARURA) leo Januari 28, 2024 wamefanikiwa kurejesha mawasiliano yaliyokatika kutokana na barabara ya goroka toangoma kukatika kufuatia uharibifu uliofanywa na mvua kubwa zinazoendelea kunyesha hapa Nchini.

Barabara hiyo ya kiwango cha changarawe yenye urefu wa kilomita 1.47 inayohudumia wananchi takribani 3500 ikiwemo wakazi wa mtaa wa Masaki na Goroka ilikatika na kushindikana kupitika kabisa kwa sasa imerekebishwa kuwezesha magari kupita na wananchi kuendelea na shughuli zao kama hapo awali.

Akizungumza katika eneo hilo Meneja TARURA wilaya ya Temeke Mhandisi Paul Mhere amesema kuwa wamejipanga kukabiliana na uharibifu utakaojitokeza na kuhakikisha lengo la serikali la kutoa huduma bora kwa wananchi linafikiwa.

"Kazi inayoendelea hapa imefanyika usiku na mchana, bado tunaendelea na tutaendelea kusimamia ubora wa kazi katika uboreshaji wa miundombinu ili kuwezesha wananchi waendelee na shughuli zao za kiuchumi na kijamii, na hili ndilo lengo la serikali" alisema Eng.Mhere

Kwa upande wake Bwana Revocatus, Mwenyekiti wa serikali ya mtaa ameishukuru serikali kwa kufanyia kazi barabara hiyo kwa haraka kwakuwa ni tegemeo lao kubwa.

"Ndugu zetu TARURA tunawashukuru sana walivyopata taarifa hii walifika haraka sana wamesaidia kunusuru baadhi ya nyumba ambazo zilikuwa zinaenda kuanguka, tungepata maafa makubwa sana hapa. kwakweli tunaishukuru sana serikali" alisema Bw. Revocatus

Serikali ya awamu ya sita kupitia TARURA imejipanga kuboresha miundombinu na kuhakikisha wananchi wanapata barabara bora kwa maendeleo endelevu.