TEMEKE KUWA NA MAHAKAMA YA MFANO NCHINI

Posted on: August 5th, 2021

Katika kuhakikisha kunakuwa na uharakishwaji wa uendeshwaji wa kesi zinazohusu mirathi, talaka na zile zinazohusu watoto. Serikali inakamilisha ujenzi wa jengo la kisasa la mahakama katika eneo la Chang’ombe wilayani Temeke litakalokuwa maalumu kwa kuendeshea mashauri hayo.

Akikagua jengo hilo leo Alhamisi tarehe 05.08.2021,Mkuu wa wilaya ya Temeke Mheshimiwa Jokate Mwegelo amesema kuwa kukamilika kwa jengo hilo kutakuwa ni suluhisho kwa mashauri hayo ambayo kwa kiasi kikubwa yamekuwa yakicheleweshwa kutokana na Mahakama nyingi kuwa na mashauri mengine tofauti.

‘’Takwimu zinaonesha kuwa wilaya yetu ina idadi kubwa sana ya watu na kuna wastani wa watoto zaidi ya 100 wanaozaliwa kila siku. Hii inapelekea kuwa na migogoro na kesi nyingi za mirathi, kesi za watoto na hata talaka’’.Alisema Mhe.Jokate

Kwa upande wake Jaji Mfawidhi wa Mahakama kuu wilaya ya Temeke Mhe.Ilvin Mugeta,alisema ujenzi wa Mahakama hiyo utasaidia kupunguza muda wa kumaliza shauri kutoka miaka mitatu hadi mitano ya sasa mpaka miezi sita  huku akisisitiza wananchi kuitumia miundo mbinu ya Mahakama hiyo vizuri.

Aidha wabunge wa majimbo ya Temeke na Mbagala ambao walikuwa miongoni mwa walioambatana na Mkuu wa Wilaya kutembelea jengo hilo na kukagua,walimshukuru Mhe.Rais Samia Suluhu Hassan kwa kutambua umuhimu wa wanawake pamoja na watoto ambao kwa kiasi kikubwa wamekuwa ndio waathirika wakuu katika masuala ya mirathi.

“Niwaombe tu wananchi waweze kuitunza mahakama hii ili iweze kudumu kwa kuwa uwekezaji huu wa serikali ni mkubwa kwa hiyo hatuna budi kudumisha usafi na kutunza mazingira yake kwa kuwa Mahakama hii ni ya mfano hapa Dar es salaam na nchi nzima’’.Alishauri Mbunge wa Mbagala Mhe.Abdallah Chaurembo

Awali akitoa maelekezo kwa Mkuu wa wilaya Msanifu majengo wa jengo hilo,Kailat Bakar alisema jengo hilo limekidhi mahitaji yote ikiwemo mahabusu za watoto,wanawake,wanaume pamoja na sehemu maalumu ya kinamama kunyonyesha watoto wanapokuwa wakiendelea kusikiliza kesi zao.

Jengo hilo litakuwa la kwanza la aina yake hapa nchini ambapo kutakuwa na mahakama ya mwanzo, wilaya na mahakama kuu ambapo zitakuwa ni maalumu kwa kusikiliza mashauri yanayohusu kesi za mirathi, talaka na watoto na linatarajiwa kufunguliwa rasmi mwezi wa tisa mwaka huu na Mhe.Rais Samia Suluhu Hassan.